Meeqqat aliasuttut puigorneqartaput
Ilaqutariinni napparsimasoqartillugu, Danmarkimi meeqqat puigorneqartartut, meeqqanik inuusuttunillu sullissisut ilisimatuullu oqarput.
Angajoqqaat arlaat napparsimatillugu toqulersilluguluunniit danskit meerartai aliasoqqajaasunngornissaminnut arlaatigulluunniit eqqarsartaatsimikkut artukkerneqarnissaminnut qanilliartortarput.
Meeqqat annilaanganertik aliasunnertillu arlaannut eqqartorsinnaaneq ajorpaat. Ilaqutariit eqqartuinissaminnut nukissaqarneq ajorput. Inersimasut ilinniarsimasut ulluinnarni meeqqanik sullissisartut sapinngisartik tamaat atorlugu akuliunnaveersaartarput.
Taamaattumik danskit meerartaat ikiuisuartussanik pisariaqartitsisartut, danskit misissuineranni paasineqarpoq.
- Meeqqat ersinngitsutullusooq ipput. Meeqqallu amerlanerit paasisinnaaneq ajorpaat sooq taama nuanniigusutsiginerlutik. Ilaat isumaqartarput niaqulaarnialerlutik oqaluttuarusunngivittarlutillu. Taakkuusarput unnukkut innarnerminni kisimiillutik qiasartut, inuiaqatigiit inooriaasiannik ilisimasalik, meeqqanik inuusuttunillu siunnersuisarfimmi pisortaq misissuinermilu aqutsisuusoq, Preben Engelbrekt oqarpoq.
- Socialministerip paasititsiniaanerit ukioqatigiikkuutaarlunilu ikorfartoqatigiiffiit attaveqaqatigiittarnermik oqaloqatigiittarnermillu suliallit aallartittariaqarpai, Preben Engelbrekt, meeqqat 50-t 13-iniit 20-nut ukiullit oqaloqatigisarlugit, allakkiai ullorsiutaalu atorlugit misissuisimasoq taama oqarpoq.
Europami ilaqutariit nappaammik nalaanneqarsimasut meerartaat 500-nik sinneqartut ukiuni arlalinni malinnaagivineqarnerisa tamanna uppernarsarpaat.
- Meeqqat inuusuttullu aliasoqqajaasunngornissaminnut arlaatigulluunniit eqqarsartaatsimikkut artukkerneqarnissaminnut qanilliartortarput, Århusip Universitetiata inuup pissusiinik ilisimatusarfittaani lektori Michael Thastum oqarpoq.
Danmarkimi inuusuttut 13-t 20-llu akornanni ukiullit 19.000-t missaat illugiimmik illuinnarmilluunniit angajoqqaaverutereersimapput, amerlanerillu ilaqutariinni nappaateqartuni peroriartornissaat ilimagineqarpoq.
