Meeqqat ajornartorsiutillit Danmarkimut nassiuttarpaat
Tamanna ulloq unnuarlu angerlarsimaffimmi Meeqqat Illuanni pisortaasumit oqaatigineqarpoq.
Torben Alnep ukiuni 40-uni kingullerni meeqqat inuusuttuaqqallu ulloq unnuarlu inissiisarfinnut inissinneqartartut qanimut malinnaavigisimavai, ukiullu 15-it kingulliit meeqqat inuusuttuaqqallu pissusaat malunnaatilimmik allanngorsimavoq.
- Meeqqat inuusuttuaqqallu, namminneq silarsuarminni inuupput. Soqutiginngilaat inersimasut kammalaatitillu namminerminut qanoq oqaasissaqarnersut. Tassa kammalaatiminnut inersimasunullu tusarnaartuungillat. Namminneq piumasaminnik inuupput, perorsaasutut ilinniagalik Torben Alne, ukiunilu 35-ini Meeqqat illuanni pisortaq taama oqarpoq
Piffissap ingerlanerani, perorsaariaaseq annertuumik allanngorsimasoq.
- Ukiut siulliit sulinitsinni immitsinnut nersualaartarpugut, meeqqat sullitagut aqussinnaalluaratsigit. Ukiunili kingullerni quliniit 15-it tungaanut ingerlaneranni meeqqat inuusuttuaqqallu aqunneqarsinnaannerat killeqaqaaq, Torben Alne oqarpoq.
Radioaviisimi oqaluttuarineqareerpoq, nunatsinni meeqqat inuusuttuaqqallu ulloq unnuarlu inissiisarfinnut inissinneqarnissaminnut utaqqisut 24-iusut. Taamatullu Kommune Kujalliup utaqqisuutai pingasut piffissami qaninnerpaammi inissinneqanngikkunik Danmarkimut ulloq unnuarlu inissiisarfinnut inissinneqariaanaasut.
- Ulloq unnuarlu angerlarsimaffiit qitiusumillu aqutsisoqarfiit meeqqat inuusuttullu ajornartorsiutaannut piareersimanngillat. Taamaalilluni meeqqat inuusuttuaqqallu inissaqanngillat, Torben Alne taama oqarpoq.
Ukiuni kingullerni arlaqalersuni, meeqqat inuusuttuaqqallu Danmarkimut sooq aallarunneqartariaqarnersut Torben Alne aperaarput.
- Ullumanna tikillugu aaqqissuteqartoqarsimannginneranut peqqutaasoraara, perorsaasunik ilinniarsimasunik pissaaleqineq. Ajornartorsiutitut siullertut oqaatigisinnaavara perorsaasut ilinniarsimasut amerlasuut maani Kalaallit Nunaanni amigaataammata, aappaattullu perorsaasut ilinniarsimasut immikkut ulloq unnuarlu angerlarsimaffinnut tunngasunut ilinniarsimasut amigaataaneri, Torben Alne oqarpoq.