Meeqqat aallartitaasimanerat misissuiffigineqassanersoq eqqartussavaat

Meeqqat Danmarkimut aallartitaasimasut pillugit maanna Naalakkersuisut siunnersuuteqartussanngorput tamatumunngalu Danmark ikiuussinnaanini naapertorlugu ikiuukkumavoq. Tamanna paasinarsivoq ullumi danmarkimi Naalakkersuisut siulittaasuat Kuupik Kleist aamma danskit ministeriunerat Lars Løkke Rasmussen ataatsimeereersullu.
Allattoq Jens Thorin
septembarip 15-at 2009 12:21

Ministeriuneq ikiuussinnaalluni piareersimavoq, kisianni ilumut misissuisoqassanersoq suli aalangiunneqanngilaq, Naalakkersuisut Siulittaasuat, Kuupik Kleist, ima oqarpoq:

- Pisarnertut oqaloqatigiilluarpugut, ataatsimut isigalugu naammasisaqarfiusumik. Oqaloqatigiinnerillu nangeqqinnissaat ammatipparput. Tassa uanga pingaartissimavara tassani pineqartut, tassalu taamanikkut meeraasut aammalu ilaqutaasa erseqqissumik paasissagaat qanoq pisoqarsimanersoq, suneqarsimanerlutik aammalu piffissami tassani qanoq iliuuseqartoqarsimanersoq ilaatigut paasinarmat suli paaseqqissaarneqarsimanngitsoq inunni pineqartunginngaanniit. Uani siunertaq pingaarnerpaaq tassaajuarpoq, inuit taakkua tarnimikkut eqqississutigisinnaasaannik iliuuseqarnissaq qanorpiaangaluarnersoq.

Taava statsministerimut oqaloqateqarninni saqqummiuppara taanna aammalu apeqqutigalugu Naalagaaffik arlaatigut iliuuseqarnissamut peqataarusussinnaanersoq. Statsministerillu nalunaarutigaa Naalagaaffik ikiuussinnaappat arlaatigut ikiuunnissamut piareersimallutik. Taava uuma suliap ingerlateqqinnerani qanorpiaq iliuuseqarsinnaassalluta siunnersuusiorfigissavarput. Taassuma saniatigut aamma eqqaatsiarpagut ulluni kingullerpaani atuakkiortup Tine Bryldip saqqummiussaani tunngasut, tassalu aamma meeqqat allarpassuit Nunatsinninngaaniit Danmarkimi ilaqutariinnut meerarsianngorsimasut 1960-kkut ingerlaneranni. Taanna erseqqivissumik suli paasisaqarfiginnginnatsigu isumaqatigiissutigaarput uterfigeqqikkumaarlutigu, Kuupik Klesit ataatsimiinnermi oqaluuserisat pillugit taama oqarpoq.

Tassa imaappa misissuisoqarnissaa ilimanarsiartortoq?

- Tassami qanoq taasariaqassanersoq suli erseqqissumik oqaatigineqarsinnaanngilaq. Kisianni siunertaq erseqqippoq, tassa inuit pineqartut ilaqutaallu arlaatigut inuunermi eqqissisimasumi ingerlaqqissinnaanerannut tunngavissiuunniarneqassasut. Suliallu taassuma qanorpiaq iluseqarnissaa siunnersuuteqarfigisussaavarput uagut. Neriuppunga ukioq naatinnagu paasisinnaassallutigu qanoq pisoqassasoq, Kuupik Klesit oqarpoq.

Tassalu statsministeri qanoq iliuuseqarnissamut piareersimavoq?

- Tassa Naalaaffiup ikiuussinnaanini naapertorlugu peqataanissani piareersimaffigaa, Kuupik Kleist taama oqarpoq.