Uummannami meeqqat 15-it Nuummut paasisassarsiorlutik angalanissaat, Air Greenland-ip timmisartuussisinnaannginera pillugu akornuserneqarpoq. Nuummut ingerlaqqinniarlutik Qaarsuarsunnut ippassaani pipput, Air Greenland-imili saqisut sulinerminnik unitsitsimmata, timmisartuussinerillu taamaatinnarneqarmata, meeqqat angalatitsissuilu sisamaasut, ualikkut Uummannamut utiinnartariaqarsimapput.
Angalaneq Dansk Folkehjælp-ip aningaasaateqarfianit aningasaliiffigineqarpoq, Uummannamilu immikkoortortaqarfianeersoq Gerda Fleischer oqaloqatigaarput aperaarpullu meeqqat utiinnartariaqarnertik paasigamikku qanoq issimanersut.
Gerda Fleischer oqaluttuarpoq, angallassisut oqaluttuarnerat malillugu meeqqat pakatsisimapput, qilanaarsimagaluaqigamikku Nuummut ulloq taanna apuuttussaanertik, taamatut neriorsorneqarnikuugamik, bilitsissatik aallaavigalugit. Taamaattumik ulloq naallugu Qaarsuarsunni utaqqisinnarlutik Uummanamut utertussanngoramik pakatsisimapput, angerlaannaleramik, Gerda Fleischer oqarpoq. Uummannamut uteramilli utaqqipput, paasiniaaffissanngoraangat paasissutissanik piniarlutik utaqqisarput. Atuanngillat, aallariataarsinnaasoralutik utaqqigamik. Meeqqat pakatsisimaarput, erinisupput. Nunaqarfinneersut sisamat ilaasussaagamik taakkua ilaat angerlarusuinnalerlutik aallaat oqarsimapput, utaqqikatakkamik ingerlaqqinnissaminnut Gerda Fleischer oqarpoq. Sammisassaqartinnissaat ajorkusoorsimavoq.
Meeqqat angalanissaanni angalatitsisut aaqqissuisullu ualimut marlunut ataatsimiissapput aalajangerlugulu angalanissaq kinguartinneqassanersoq, timmisartuussinerluunniit aallarteqqippat angalanissaq ingerlanneqassanersoq.
