Meeqqat 14-iugaangata ataaseq eqqartuussaasimasumik angajoqqaaqartarpoq

Meeqqat Inuusuttullu eqqartuunneqarsimasunik isertitsivimmiititanillu angajoqqaallit 2006-imi 1.248-simapput. MIPI-p meeqqat inuusuttullu eqqartuunneqarsimasunik isertitsivimiititanillu angajoqqaallit pillugit saqqummersitaani tamanna atuarneqarsinnaavoq.

Taakkunannga meeqqat 14-t ukiup taassuma ingerlanerani marloriarlutik tamanna misigaat. Meeqqat 947-t ataataqarput pisuutinneqartumik, meeqqallu 269-it anaanaqarlutik pisuutinneqartumik. Meeqqat 32-t angajoqqaatik tamarmik pisuutinneqartut aamma misigaat. Meeqqat taakku 1.248-t pineqaatissinneqartunik angajoqqaallit saniatigut meeqqat 28-t angajoqqaatik eqqartuussivimmut sassartinneqartut pisuutinneqaratilli misigaat.

Meeqqat 1.248-t 2006-imi angajoqqaamik minnerpaamik aappaata pisuutinneqarneranik misigisaqartut assigaa.

Kalaallit Nunaanni meeqqat 14-iungaagata ataaseq pisuutinneqartumik angajoqqaaqartoq kingunerisaanillu pineqaatissinneqartumik.

Meeraq taamatut angajoqqaaminik misigitinneqartoq, tarnimigut ikilerneqartarpoq, kamaqqajaasunngorluni aamma pisuusutut misigisinnaasarluni imaluunniit kanngusuuteqartarluni, tamannalu nunani tamalaani misissuisarnerit takutereerpaat.

MIPI isumaqarpoq, Kalaallit Nunaanni meeqqat inuusuttullu eqqartuunneqarsimasunik isertitsivimmiititanillu angajoqqaallit aamma assingusunik misigisaqartartut. Nunatsinninili misissuinerit sukumiisut suli amigaataapput, suliarineqartariaqarlutillu, MIPI isumaqarpoq.

MIPI aamma isumaqarpoq Nuummi matoqqasumik inissiisarfiliortoqarneratigut meeqqat angajoqqaaminnik attaveqartuarnissaat anguniarlugu ininik pulaarfissatut tulluarsakkanik inissiisarfimmiititsisarnermilu maleruaqqusanik nutaanik pilersitsisoqartariaqartoq.

MIPI-p saqqummersitaa www.mipi.gl-imit aaneqarsinnaavoq.