Meeqqap arriitsumik sungiussiartornissaa pingaaruteqarpoq
Tassanilu meeqqap najugaqarfigiligassaminik arriitsumik sungiussiartornissaa pingaartinneqartartoq – nukappiaqqap qulinik qaammatillip Maniitsumi angajoqqaarsiaminiit arsaarinnissutigineqarneratut pinnagu.
Kalaallit Nunaanni ornitassat ungasissorsuarmiissinaasarput. Danmarkimili una pisuuppat, piffissami sivisujaami meeqqap akuttunngitsunik arnarsiaminut attaveqartarnissaa siunnersuutigissagaluarpara. Meeraq arnarsiami tikkanik naasaqarsinnaaniassammat arnarsiaata arlaannik pianik tunissagaluarpara, arnarsiaatalu assinga saqqumitillugu eqqartortassangaluarpara, Inger Thormann, Skodsborgimi meeqqat nakkutigineqartarfianni tarnip nakorsaatut atorfilik oqarpoq. Tassani meeqqat 20-t, arfinillit tikillugit ukiullit paaqqutaraat.
Maniitsumiit Sisimiunut ungasinnera pissutigalugu oqarasuaatip qarasaasiatigullu internetip atorluarnissaat Inger Thormannip siunersuutigai.
Meeqqap arnarsiani tikinngikkaluarlugu assingata takusinnaanera internetikkulluunniit takullugulu nipaata tusaasinnaanera periarfissatut allatut isigineqarsinnaavoq.
Meeqqap anaanaata angajoqqaarsiallu immikkut ilisimasalimmik ikiorteqarnissaat siunnersuisoqarnissaallu Inger Thormannip pingaartutut isigaa. Arnarsiaasoq ajuallassimaguni artorsaateqarlunilu aamma immikkut ilisimasalimmit ikiorserneqartariaqarpoq, uanimi pisumi akuleruttut tamarmik arlaatigut ikiorserneqartariaqarput, Inger Thormann oqarpoq.