Meeqqanut tapit qaffanniarneqarput

Kultureqarnermut naalakkersuisup Tommy Marø angajoqqaat kisermaasut 2008-miit aningaasat pisartagaat qaffaaffiginiarlugit aningaasanut inatsisip pingajussaaneerneqarnerani ulloq 14. November inassuteqassaaq, tamannalu anaanamit kisermaasumit Evnike Motzfeldtimit piffissanngorsorineqarpoq.

- Meeqqamik kisermaassaqarluni akikitsuunngilaq, akisuvoq. Meerartaaramali malugaara ukiup affakkaarlugit tigusartakkavut amigartut. Tassa meeqqat atisaqarniarneri, meeqqerivinnut akiliutigisartakkat meeqqallu nerisaqarniarneri akilersorlugit kisimiittuulluni oqimaatsupilussuuvoq. 1900-kkunnilu meeqqanut tapit qaffanneqarsimasussaagaluarput, Evnike Motzfeldt oqarpoq.

Ullumikkut angajoqqaat kisimiillutik perorsaasut, ukiup affakkaarlugit 4.548 koruuninik meeqqanut tapisisarput. Ataataasoq anaanaasorluunniit meeqqamut najunngisaminnut akiliinngitsoorpat Namminersornerullutik Oqartussat akiliussisarput.

Meeqqaminnik kisermaassisut aningaasat pisartagaat annikippallaarmata kultureqarnermut naalakkersuisup Tommy Marøp, ukiup affakkaartumik tapiissutaasartut 1.455 koruuninik qaffaaffiginiarpai.

- Meeqqanut tapit aammalu meeqqanut akilersuutit nalimmassarneqarnissaat maannakkut naatsorsorteqqamivakka. Taamaasillugit aamma naalakkersuisunut saqqummiutissavara sorleq aningaasanut inatsimmut 2008-mut naapertuunnersoq, Tommy Marø naggasiivoq.

Namminersornerullutik Oqartussat angajoqqaat akiliisinnaangikkaangata akiliussisarnerminni ukiumut 205 mio. koruunit atortarpai. Aningaasallu amerlassusaat akileraartarnermut pisortaqarfimmit oqaatigineqarput, ukiuni arlaqartuni nikissimanngittut.