Meeqqanut suliniutissat 83 millioni koruuninik nalillit Demokraatit saqqummiuppaat

Politikerit sulilernissaat meeqqat utaqqisinnaanngilaat. Maannakkut qanoq iliuuseqartoqartariaqarpoq, taamatut isumaqarput Demokraatit.
Allattoq Jaaku Lyberth
marsip 09-at 2009 15:43

Meeqqat atugarissaarnerulernissaat anguniarlugu partii Demokraatit siunnersuutinik sisamanik immikkoortulimmik ullumi saqqummiussivoq, 83 millioni koruuninik naleqartumik. Taamaaliornikkut meeqqat kaannatik sumiginnarneqaratillu inuuneqalernissaat Demokraatit isumaat tunngavigalugu anguniarneqarpoq. Taakkualu iluanniissaaq meeqqat atuarfiini tamani meeqqanik atuartunik akeqanngitsumik nerisitsisarneq. Taanna ukiumut 36 millioni koruunit missaannik akeqassaaq. Illoqarfinni tamani sullissisunik atorfinitsitsinissaq Demokraatinit siunnersuutigaat. Taakkualu ukiumut 8 millioni koruuninik akeqassangatippaat. Innuttaasunut naalakkersuisunullu akunnermiliuttartussatut meeqqanut ombudsmandimik atorfinitsitsisoqarnissaa aamma siunnersuutigaat, taannalu ukiumut 3 millioni koruuninik akeqartussatut Demokraatit missingersuusiorpaat. Meeqqat inuusuttullu ornittagaannik illoqarfinni tamani pilersitsisoqarnissaa aamma siunnersuutigaat, taakkualu ukiumut 36 millioni koruuninik akeqassapput. Demokraatit siulittaasuat Jens B. Frederiksen taama oqarpoq. Meeqqat 18-inik ukioqalernissaannut aningaasanik ileqqaarinninnerup atorunnaarsinneqarneratigut aningaasat 18,3 millioni koruunit sipaarneqarsinnaasut, Demokraatit isumaqarput.

Puisit amiisa tunineqartarnerinut tapiissutit affaannanngortillugit 13 millioni koruunillu meeqqanut atorneqassasut Demokraatit isumaqarput.

Aamma oqqassutasinnaasumik allamik siunnersuuteqarput, tassalu nunaqarfinni avinngarusimasunilu illuliornermut tapiissutit 15 millioni koruuninik ilanngarneqassasut Demokraatit siunnersuutigaat.