Meeqqanut suliniutillit Air Greenlandip tapersiiffiginiarpai

Kalaallit Nunaanni meeqqat inuunerinnerunissaannut Air Greenland manna ilannguppoq. Suliniut Air Greenlandip taaguuteqartippaa “meeqqamiit - meeqqamut”.
Allattoq Lotte Holm
apriilip 03-at 2009 08:29

Meeqqamut ataatsimut Atlantikoq qulaallugu angalasumut bilitsi qorsummik taasartagaat 4.100 koruuninik akeqartoq bilitsimit 130 koruunit Air Greenlandip meeqqanik suliniutilinnut tunniuttarniarpai, tassa siumut utimullu 260 koruunit tunniunneqartassapput, suliniaqatigiiffiit Kalaalit Nunaanni meeqqat inuusuttullu atugaannik ineriartorsinnaanerinillu pitsanngorsaanissamik annertuumik suliniuteqartut Air Greenlandip taamaalilluni tapersersorusullugit.

Suliniut aallartinneqareerpoq, meeqqallu tamarmik juunip ulluisa aallaqaataata aggustillu ulluisa 31-ata akornanni angalasut bilitsii tapiissuteqarnermi ilaassapput, angalanissaq kingusinnerpaamik juunip ulluisa aallaqqaataanni pisiarineqarsimappat.

Aningaasat suliniaqatigiiffinnut Air Greenlandip tapersiiffigissallugit toqqagaanut inuiattut ullorsiornermi juunip ulluisa 21-anni agguaanneqassapput.

Taakku tassaapput Nanubørn, Meeqqat Inuunerissut, Mælkebøtten, Red Barnet, Peqatigiiffik Kalaallit Meerartaat aamma Inuit Issittormiut Siunnersuisoqatigiiffiata, ICC-p, Inuusuttunut suliniaqatigiiffia, ICYC.

- Suliniartoqarnera Air Greenlandip nuannaarutigalugu ataqqillugulu malugisimavaa, suliniaqatigiiffiillu taakku meeqqat inuusuttullu atugaannut pitsanngorsaaniartuummata tapersersorusuppavut, Air Greenlandimi tuniniaanermut nittarsaassinermullu pisortaq, Christian Keldsen, oqarpoq.