Meeqqanut suliniaqatigiiffik: Naalagaaffik akuliuttariaqalerpoq

Meeqqat sumiginnakkat amerliartuinnartut maannangaaq iliuuseqarfigineqanngippata kinguaariit tulliuttut sapanginneqassasut, peqatigiiffik nunatsinni meeqqanik suliniutilik Foreningen Grønlandske Børn naliliivoq. Taamaattumik danskit naalagaaffiata pimoorussilluni ikiuunnissaa piffissanngortoq peqatigiiffiup qullersaa Bente With isumaqarpoq:

- Meeqqat amerliartuinnartut sumiginnarneqartarnerat iliuuseqarfigineqapallanngippat kinguaariit tulliuttut sapanginneqassapput. Kalaallit meerartaasa danskit meerartaannut naleqqiullutik ajornerusunik atugassaqartinneqarnerat peqqusiileqinarpoq, kalaallimmi naalagaaffeqatigiinnermi aamma ilaapput. Bente With oqarpoq.

Nunatsinni isumaginninnermi ajornartorsiutit isigiinnarumajunnaarlugit Foreningen Grønlandske Børn Danmarkimi qinikkanut saaffiginnippoq maannangaaq iliuuseqartoqaqqullugu. Aammali ajornartorsiutinik qaangiiniarnermi inuit suli amerlanerusut suleqataasariaqarnerarpaat.

- Kalaallit Nunaanni assortuutiinnavilluni ingerlasoqarpoq. Naalakkersuisut oqarput, kommunit ajornartorsiutit namminneerlutik iluarsisariaqaraat. Kommunelli naammattunik inuttassaqarnatillu akissaqanngillat. Taamaattumik oqaluinnarni akisussaassuseqartumilli iliuuseqarnissaq piffissanngorpoq. Bente With oqarpoq.

Taanna aamma isumaqarpoq, naalagaaffiup tapiissutaasa ilaat isumaginninnermut atugassanngorlugit immikkoortinneqartalernissaat eqqarsaatigineqartarialersoq.

- Tapiissutaasartut ajornartorsiutinik oqilisaassinngilluinnarput. Bente With naliliivoq.

Danskit naalagaaffiata nunatsinni ajornartorsiortoqarneranik nassuerutiginnilluni ikiuunnialissagaluarpat, minnerunngitsumik aningaasaliissuteqartoqarnerunissaa eqqarsaatigalugu qujarutissallugu, nunatsinni kommunit isumaginnittoqarfiisa peqatigiiffianni siulittaasoq Magga Fencker oqarpoq:

- Naalagaaffeqatigiinnermi ajornartorsiutit ima annertutigilersimapput, suminngaanniilluunnit tapersersorneqarnissarput pisariaqartilersimallugu. Taamaattumik kinaluunnit ikiuukkusuttoq tikilluaqqunarlunilu qujarunnarpoq. Magga Fencker oqarpoq.

Aammali nunatsinni qinikkat suliassanik pingaarnersiuillutik tulleriiaareriaasiat ajornartorsiutit annertusisimanerannut pissutaaqataasut allanngortittariaqartorlu, Magga Fencher isumaqarpoq.

- Aningaasat pisariaqartitatsinnut atorneqanngillat, akerlianilli sanaartugassanut annertuunut soorlu mittarfeqarfinnut talittarfinnullu atorneqarnissaannik pilersaartuteqartoqarluni. Taamaattumik ajornartorsiutit qaangerneqassappata pingaarnersiuilluni tulleriiaareqqittoqartariaqalerpoq ataqatigiinnerusumillu sulisoqartariaqalerluni. Magga Fencker naliliivoq.