Meeqqanut siunnersuisoqatigeeqalernissaq inatsisartut itigartitsissutigaat

Nunatsinni meeqqanut siunnersuisoqatigiinnik pilersitsisoqarnissaanik Demokratineersup Palle Christiansenip siunnersuutaa Inatsisartuni ullumi oqilliserineqangaatsiariarluni amerlanerussuteqartunit itigartinneqarpoq.

Naalakkersuisut aamma tapersiinngillat. Meeqqanut siunnersuisoqatigeeqalernissamut massakkut piffissaanngitsoq, Ilaqutariinnermut Naalakkersuisoq Aleqa Hammond oqarpoq.

Siunnersuutimi amerlanerussuteqartunit ilalerneqannginnera Palle Christiansenip ima tiguaa:

-Meeqqanut Siunnersuisoqatigeeqartuuppat taanna Inatsisartunut Naalakkersuisunullu toqqaannartumik siunnersuisartutut inissisimassagaluarpoq, ullumikkut sullissiviit sulianiaqatigiiffiillu immikkoortut tusarniarneqaannartarput, pissutsillu taamaannerat naammagingagu siunnersuuteqarpugut.

Palle Christiansenip siunnersuutimi amerlanerussuteqartunit itigartinneqarnera ajuusaarnarnerarpaa paasiumiitsillugulu.

- Illuatungiliuttutut siunnersuutitta amerlasuut itigartitsitsutigineqartarnerat naatsorsuutigereersimavarput, siunnersuutitsinnullu assigusumik Naalakkersuisut ukiualuit qaangiuppata siunnersuuteqarnissaat aamma naatsorsuugaarput taamanikkussamullu tapersersuiumaarpugut, Palle Christiansen oqarpoq.

Palle Christiansenip siunnersuutaanut Atassut Demokraatit Kattusseqatigiillu Partiaat tapersiipput, taava Siumut aamma Inuit Ataqatigiit tapersiinngillat, siunnersuullu taamaattumik Inatsisartut ataatsimiititaliaannut ingerlaqqigani aappassaaneerneqartussanngorpoq.