Meeqqanut siinniisuujumasut 19-iupput
Siunnersuisarfimmut, allattoqarfimmik Siunnersuisoqatigiinnillu ilaqartussamut, meeqqanut sinniisaajumallutik siunnersuisarfimmullu siuttoorusullutik 19-it qinnuteqarput.
Ilaqutariinnermut Naalakkersuisoqarfimmi immikkoortortami pisortaq, Kirsten Olesen, taama ilisimatitsivoq.
Allagarsiinermut kingullermut qinnuteqartuni 19-isuni arlallit oqaloqatiginninnissamut aggersarneqarput, qanittukkullu toqqaasoqassasoq Naalakkersuisoqarfiup naatsorsuutigaa.
Naak Meeqqat pisinnaatitaaffiinik siunnersuisarfik pillugu inatsit marsip aallaqqaaataanni atuutileraluartoq, Meeqqat illersuisuat suli toqqarneqanngikkaluartoq, allaffimmi pisortaq naapertorlugu ajornartorsiutissaqanngilaq.
Tassamigooq Meeqqat inuusuttullu pillugit ilisimasaqarfiup atorunnaareersup, MIPI-p, sulisuisa allattoqarfimmut nutaamut nuuttussat suliaminnik nuussuinerat suli naammassinngimmat.
Nunatsinni meerartatta naammagittaalliornissamut pisinnaatitaafiisaa atuutsineqarnissaat, Meeqqat Illersuisuata suliassaraa. Aamma kommunit suliaannut atatillugu nunalu tamakkerlugu inatsisiliormermi tusarniaanerni ilanngullugu tusarniaaffigineqartassaaq.
Naalakkersuisoqarfik ullumi ilisimatitsivoq, Meeqqat illersuisortaassaat qaammat naanngitsoq ilisaritinneqarsinnaassasoq, taannalu ukiuni pingasuniugallartoq atorfinitsinneqassasoq, sivitsuinissarli aamma periarfissaasalluni.