Meeqqanut poortukkat angajoqqaanullu nerisassat
Tamanna meeqqanut inuusuttunullu suleqatigiiffiup Nanu Børn-ip tunisineratigut piviusunngorpoq.
Siulittaasoq Krissie Winberg oqarpoq assigiinngitsorpassuarnit ikiorluarneqarsimallutik:
- Nunatta tamaat angunissaa siunertariuarsimavarput. Massakkutut iliornerput ukiut pingajussaa ingerlapparput. Ukiorlu manna inoqarfiit qulit angusinnaasimavagut juullimut nerisassanik agguaalluta. Aamma meeqqanut tunissutissanik agguaasimavugut, Krissie Winberg oqarpoq.
Taavamiuna sumiut ukioq manna tunissuteqarfigineqartussat?
- Qaanaaq nunaqarfittaalu, ukiorlu manna Qasigiannguit ilaavoq. Taakku saniatigut Tasiilaq nunaqarfittaalu aamma Illoqqortoormiut. Taamaattumik assut ulapissimavugut, Krissie Winberg oqarpoq.
Tamakkorpassuit anguneqarsinnaasimapput akissarsiaqaratik sulisut ikiuulluarnerisigut. Sumiiffinnimi assigiinngitsuni niviarsiat ikiortigineqarput, Pilersuisumilu sulisut poortuinermut ikiuussimapput. Aamma Air Greenland akeqanngitsumik assartuisimavoq.
- Tassa kikkut tamarmik ikioqatigiilluarsimapput iluatsitsilluarnitsinnut, Krissie Winberg oqarpoq.
