Meeqqat minnerit peqqissunngorumallutik pinnguarsinnaanngorput.
Pinnguaat Peqqinnartoq/Det sunde spil PAARISA-meersoq tassaavoq meeqqanut sisamaniit qulit missaanni ukiulinnut angajoqqaavinullu pinnguaat oqaatsit marluk atorlugit suliarineqarsimasoq.
Pinnguaat aserujaatsuuvoq, ilioqqaavia ilioqqagassallu soorlu ilaatigut appelsiinanik orangiaasunik, eertanik qorsunnik paarnanillu qerningajattunik assiliartalersorneqarsimallutik.
Pinnguaat aqqutigalugu meeqqat minnerit nuannisarlutik nerisassat aalanerlu pillugit ilisimasaqalersinnaapput, ilutigalugulu oqaatsiminnik ineriartortitsinerminni iluaqutigisinnaallugu. Taakku tassaapput peqqissumik inuuneqalernissamut tunngaviusut.
Meeqqat pinnguaatigalutik nerisassat suut peqqinnartuuneri peqqinnanngitsuunerilu pillugit ilisimasaqalissapput. Tunngaviusoq ajornanngitsuararsuuvoq : Nerisassat peqqinnartuugaangata suli amerlanerusunik siumut ingerlasoqarsinnaavoq – peqqinnanngitsuugaangata, soorlu sodavandi tunisassiallu ullaakkorsiutit sukkoqarpallaartut, utimut ingerlasoqartarluni.
Ilaqutariit pinnguaat aallaavigalugu angerlarsimaffimminni nereriaasertik inooriaasertillu pillugit oqaloqatigiilernissaat innersuussutigineqarpoq. Aammattaaq perorsaasut ilinniartitsisullu ulluinnarni meeqqat ilagalugit pinnguaammik atuisarnissaat pissusisamisuuginnassaaq.
Pinnguaat Peqqinnartoq Info Design suleqatigalugu ineriartortinneqarpoq, sinerissamilu tamarmi meqqerivinni, fritidshjeminut atuarfinnilu klassinut minnernut nassiussorneqassalluni.
Saniatigut aamma sammisaq pitsaasoq tapersersorniarlugu pinnguaat Brugsenip, Pisiffiup Pilersuisullu pisiniarfiini 99 koruunilerlugu pisiarineqarsinnaavoq. Aningaasat isertinneqartut toqqaannatumik PAARISA-mi immikkut nakkartinneqassapput, peqqinnartunillu sammisaqartitsinissanut tapiiffigineqarnissamik qinnuteqarfigineqarsinnaassallutik.
