Meeqqanut pinerliisimannginnermut uppernasaatit ukiarumiit atulissapput

Nammineq qitornanik atoqateqarneq - assinik, meeqqanik atoqateqartunik ersersitsisunik, siaruarterineq imaluunniit meeqqat 15-it inorlugit takkuanni tamataajarneq.

Taamaattunik pinerluuteqarsimalluni eqqartuussaasimasunut tunngasuni Meeqqanik pinerliisimannginnermut uppernarsaatit atorneqartassapput.

Meeqqanik 15-it inorlugit ukiulinnik susassaqartussaallutik nutaamik atorfinitsitsisut tamarmik meeqqanik pinerliisimannginnermut uppernarsaammik pissarsiniarnissamut pisussaassapput. Tassalu perorsaasut, timersornermi sungiusaasut, angerlarsimaffimminni paarsisut atuarfiillu illutaanik paarsisut assersuutigineqarsinnaapput.

Meeqqanik pinerliisimannginnermut uppernarsaat tassaavoq Pinerluuteqarsimasunik Qitiusumik Nalunaarsuiffimmiit meeqqanut 15-it inorlugit ukiulinnut inatsisinik unioqqutitsisimasut nalunaarsorsimaffigisaannit paasissutissanik pissarsisarneq.

Eqqartuussaasimanerit pillugit paasissutissanut sanilliukkaanni Meeqqanik pinerliisimannginermut uppernarsaat taamaallat meeqqanik 15-it inorlugit ukiulinnik kinguaassiuutitigut innarliisimaneq pillugu eqqaartuussaasimanermik takutitsisuuvoq.

Eqqartuussaasimanerit pillugit paasissutissat ukiut tallimat qaangiunnerannik nunguterneqartartut, meeqqanik pinerliisimannginermut uppersasaatit ukiut 20-it tikillugit atasinnaassapput.

Meeqqanik pinerliisimannginermut uppernarsaatit pillugit inatsisissaq sivisuumik utaqqisaavoq, ilaatigullu marloriarlugu tusarniaassutaasimalluni. Inatsisissarlu Inatsisartuni ualimut suliarineqassaaq.

Sulisitsisut meeqqanik pinerliisimasunik atorfinitsitsisinnaapput. Sulisitsisulli nalunngiinnartusaavaa, atorfinitsitani pinerluuteqarsimasoq.

Meeqqanik pinerliisimannginnermut uppernarsaatit immini naammanngillat, meeqqanullu pinerlussimasut taamaallaat paasinarsisissinnaallugit.

Taamaammat meeqqanut kinguaassiutitigut atornerluisarneq qaangerniaraanni allanik aamma iliuuseqartoqartariaqartoq, inatsisissamut oqaaseqaatini allassimavoq.

Nuna tamakkerlugu meeqqanik pinerliisimannginermut uppernasaatinik ukiumut 360-it pissarsiniartoqartassasoq ilimagineqarpoq.