Meeqqanut ombudsmandimik pilersitsisoqassanngikkallarpoq
Meeqqanut ombudsmandimik pilersitsisoqarnissaa Inatsisartuni siullermeertumik Demokraatiniit siunnersuutigineqartoq, naalakkersuisut maannakkuugallartoq itigartitsissutigaat.
- Uagut børneombudsmandimik taavarput, immaqa oqarsinnaagaluarpugut meeqqat advokatiat. Nalunnginnakku kommunerpassuatsinni taavalu Namminersornerullutik Oqartussaninngaanniit suliniuterpassuit meeqqanut inuusuttuaqqanullu ingerlaterusunneqarlutillu aallartinneqartartut, Astrid Fleischer Rex oqarpoq, nangipporlu:
- Taavalu massakkut aamma MIPI pigivarput, tassani allagarparpassuit paasissutissarpassuillu meeqqanut inuusuttuaqqanullu tunngasut pigivagut, kisiannili kia tamakku atuartarpai? Kia piffissaqarfigivai qaqissallugit? Taamaammat børneombudsmandimik siunnersuuteqarpunga taassuma MIPI-miittut atuariarlugit nunani allaniit paasisat atuariarlugit nunatsinnut qanoq atorsinnaanersut aamma paaseriarlugit maanilu ataatsimiittarnerni seminarini paasisat nunatsinni qanoq ingerlasoqarneranik paasissutissat, tamakku ataatsimut siunnersuutigisarlugit kommuninut imaluunniit naalakkersuisunut, Astrid Fleischer Rex oqarpoq.
Lars-Emil Johansen siunnersuummut tunngatillugu isumaqataasoq aperaarput, siornatigut Siumukkut meeqqat ombudsmandeqarnissaat siunnersuutigisarsimagaluaraat tamatumuuna sooq taamaaliorsimannginnersut.
- Tunngaviatigut tapersersorparput, kisianni naalakkersuisut isumaqatigaagut oqarmata maannakkut allaffissornikkut pilersitsiortorneq pinnagu meeqqanut toqqaannartumik iluaqutaasumik pilersitsinissaq pingaaruteqarnerpaasoq. Aningaasat meeqqanut inuusuttunullu suliniarnermut atorneqarnerusariaqarput, uangalu isumaqarpunga ullumikkut suliniutit tigussaasut ingerlaannartumik sunniuteqarsinnaasut, soorlu sumiiffiit imigassartorfiunatillu ikiaroorfiunngitsut, inersimasut akisussaassuseqarfiunngitsumik iliorfiini meeqqat sumunnarfissaqartariaqarput! Soorlu Tasiilap kommuniani Amarngivatut ittunik ornitassaqarnissaat isumagisariaqarparput, inatsisartuni ilaasortaq Lars-Emil Johansen taama oqarpoq.
