Meeqqanut ombudsmandeqalinngikkallassaaq
Maliina Abelsen isumaqarpoq suliassaqarfiit arlallit meeqqat ombudsmandiata ataani inissisimasussatut takorloorneqartut MIPI-p isumagisareerai.
- Maannakkut atugassarititaasut killeqartillugit, aningaasaqarnikkut soorluttaaq aamma sulisoqarnikkut tunngasutigut, isumaqarpunga pingaartuusoq, suliniutaareersut qalliinnarlugit nutaanik iliuuseqannginnissaq pingaaruteqartoq, Maliina Abelsen oqarpoq.
Demokraatilli siunnersuutaasa ilaat, tassa naalakkersuisunut siunnersuisartutut atuuffeqarnissaanut tunngasortaa, taperserpaa, qularnaaqqaarusuppaali meeqqat ombudsmandiat suliamik tigusissappat taamatut ataqatigiissaarineq pitsaanerpaajunersoq.
Maliina Abelsenip neriorsuutigaa meeqqat ombudsmandeqalernissaanik eqqarsaateqarneq, meeqqanut inuusuttunullu suliassaqarfinnik ilusilersuinermini pilersaarusiornermini ilaatinneqassasoq.
