Meeqqanut neqeroorutit Tunumi sipaarniarfigineqarput

Atuareernerup kingorna ornittaq, Amarngivat, Tasiilami, Kulusummi kiisalu Kuummiuni immikkoortortaqartoq, pingaarnertut meeqqanut sumiginnakkanut sullissisuusoq, 100.000 koruunit sinnerlugit annaasaqarpoq - Kommuneqarfik Sermersuumi akisussaasuniit ilisimatinneqanngivilluni.

- Eqqaamasara malillugu 125.000 koruunit peerneqarsimapput. Taamaaliortoqarporlu uanga ornittagarluunniit ilisimatillannguarnata, Lars Göransson, Amarngivami pisortaasoq oqarpoq.

Amarngivami atuisut meeqqat arfinillit 14-illu akornanni ukiullit 100-t missaanniipput, kisianni aamma ornittagaq atualertussanut piareersartarfittut atorneqatarpoq, unnuigallartarfittut, atornikuerniarfiulluni kiisalu meeqqaanut nerisitsisarfittut.

Sipaarniuteqarnerlumi aamma kinguneqarpoq:

- Kingumut utersaartariaqarsimavugut, assersuutigalugu sulisorput ataaseq soraarsittariaqarsimavara, kommunillu aaqqissuuteqqinneqarneranik pissuteqartumik ammasarnigut allanngortittariaqarsimallugit. Takusinnaava Amarngivap ullut tamaasa ammasarnissa pisariaqartinneqartoq, kisianni taamaliorsinnaanngilagut.

Aammattaaq aningaasakinnerulernermik pissuteqartumik meeqqanut neqeroorutigisinnaasat annikilleriartut, Lars Göransson oqarpoq.

- Aammattaaq ornittagaq qimallugu assigiinngitsunik suliniuteqarsinnaagaluarpugut, kisiannili aaqqissuusseqqinnerup kingunerisaanik sipaarniarnerit taamaaliortissinnaajunnaarsippaatigut, taamaalilluta illumut pituttugaalerpugut.

Amarngivalli atorfissaqartinneqarpoq taamaattumillu aqqissuusseqqinnerup siornatigutulli inissisimalernissaq anguniarlugu Lars Göransson, Kommuneqarfik Sermersuumut aningaasanik amerlanerusut missingersuutinut ilanngunneqartalernissaat oqariartuutiginiarpaa.

- Uagut tamaaniinngikkaluarutta meeqqat ilaannut ajortorujussuussaaq, allanullu pitsaasumik misigisaqarnmissamut periarfissaaginnarpoq, taamma oqarpoq Lars Göransson.

Amarngivat ukiumut 2,5 mill. koruuninik missingersuuteqarpoq, taakkulu Tasiilamut, Kulusummut kiisalu Kuummiunut agguataarlugit tamakkiisumik atorfinnut arfineq marlunnut naapertuupput.