Meeqqanut inuusuttunullu politikki piviusunngortinneqalerpoq
Tamanit maqaasisaavoq atorfilittallu apersuutigiuartarpaat. Kiisami piviusunngulerpoq.
Meeqqanut inuusuttunullu politikki 2012-imi inatsisinngortinneqarpoq, maannamulli Qaasuitsup kommuniani atuutsinneqarsimanngilaq.
Kulturimut atuarfeqarnermut sunngiffimmilu ataatsimiititaliap ippassaq meeqqanut inuusuttunullu politikkissaq ataatsimiissutigereerlugu atuutsilernissaa akuersissutigalugaa.
-Ullumikkut ataatsimiititaliami siulittaasuuffinni ataatsimiinnermini taannarpiaq meeqqanut politikki eqqartorlugu akuersaarpaat, taamaalilluni kommunal bestyrelsip ataatsimiinnissap tullissaanut akuerineqavittussanngorlugu ingerlanneqartussanngorluni, Kulturimut, atuarfeqarnermut sunngiffimmilu ataatsimiititaliami siulittaasoq, Kristian Broberg oqarpoq.
Inatsisinngortitsinermiit ukiut pingasut qaangiummata aatsaat Qaasuitsup kommuniani politikkeqalernissamut piareeriartorput, ilaatigut meeqqanut inuusuttunullu suliniarnerit kommunimi atorfillit maleruagassaat politikkissami ilaapput.
Aamma atuaruk Ataatsimiititaliaq: meeqqanut inuusuttunullu suliniarnermut aningaasat amerlanerusut
Atorfillit taarseraannerat kinguaattoortitsivoq
Atorfillillu taarseraannerisa kingunerisaanik meeqqanut inuusuttunullu politikki atulersinneqajaarsimannginneranut peqqutaaqataasoq, Qaasuitsup kommuniata direktøria, Hans Eriksen oqaluttuarpoq.
-Suliat assigiinngitsut ingerlanerini atorfillit taarserarsimapput, taamaattumillu siusinnerusukkut suliarineqarsinnaasimanngilaq, Hans Eriksen KNR-imut oqarpoq
Politikkeqannginnermi meeqqanut sullissineq uninngasimanngittoq Hans Eriksenip oqaatigaa.
- Oqarsinnaanngilagut meeqqanut inuusuttuaqqanullu suliat uninngaasimasut. Taamaattoqanngilaq. Kisianni taanna qulaani tikkuussisuusussaq ilumoorpoq amigaatigineqarmat, taannalu maannakkut suliarineqarluni ingerlanneqarpoq, Qaasuitsup kommuniata direktøria, Hans Eriksen oqarpoq.
Qaasuitsup kommuniani kommunal bestyrelsit juunip qaammataani ataatsimiissutigeqqissavaat.
