Meeqqanut immikkut inissiivik pisariaarummat matuaat

Tunillanneqarsimasulli ikiliartormata tunillanneqarsimasut immikkoortinneqartarfiat matuneqarpoq. Meeqqanut nakorsaq Inga Hjuler taama oqarpoq:

- Meeqqat kissarneqartut taamanikkut amerlaqaat. Ataaseq kissarneqalersorlu alla kissarneqalersarpoq, sivikitsuinnarmillu napparsimasarput. Nualluummilli nappaalasut amerlaqimmata immikkoortortaqarfimmik ammaavugut, Inga Hjuler oqarpoq.

Meeqqat katillugit qulit nualluummik H1N1-imik nappaatillit Dronning Ingridip Napparsimmavissuani uninngatinneqarput, amerlanerusulli nualluummik nappaateqarsimanissaat Inga Hjulerip ilimagaa, angajoqqaavimi aamma nappaalapput.

Meeqqat angajoqqaatik ilagalugit napparsimmavimmi uninngasarput, ulloq ataaseq imaluunniit marluk qaangiukkaangata angajoqqaavi aamma napparsimalertarput, taakkuli aamma sivikitsuinnarmik napparsimasarlutik.

Nualluummilli nappaalasut ikilimmata immikkoortortaqarfiit sapaatip-akunnerup siuliani atorunnaarsinneqarput.

Meeqqalli kissarneqalerpata angajoqqaajusut annilaangasariaqanngitsut, meeqqat nakorsaata Inga Hjulerip erseqqissaatigaa:

- Meeqqat amerlanerpaartaat ulloq ataaseq marlulluunniit kissarneqarput, quersorlutillu, kingornali ajorunnaartarlutik. Nalinginnaasumik nualluummik nappaateqartunut sanilliullugu sivikinnerusumik napparsimasarput, Inga Hjuler oqarpoq.

Meerarli kissarneqarujussuassappat nakorsiaanneqartariaqassanersoq aperigatsinni oqarpoq meeqqap utoqqaassusaa apeqqutaasoq.

- Meeraq arfinilinnik qaammateqarpat, imaluunniit taamassuma missaannik qaammateqarpat kissarneqarpallu taava soorunami nakorsiaanneqassaaq, meeqqalli angerlarsimaffimmi paaqqutarineqarnissaa nalinginnaasuuvoq, aatsaallu ernumanartoqarsinnaappat napparsimmaviliaanneqassalluni, meeqqanut nakorsaaneq Inga Hjuler oqarpoq.

Paasisat Europameersut tunngavigalugit Nunatsinni Nakorsaaneqarfiup akiuussutissanik kapuuinerup allanngortinneqarnissaa nalunaarutigeqqammerpaa.

Nualluummut H1N1-imut kapuuinerit siulliit ima sunniuteqarsimatigipput, akiuussutissamik aappassaanik kapitinnissaq pisariaqarani.

Tunillatsinnissamulli ulorianartorsiornerusinnaasut, soorlu kræftertut HIV-milluunniit nappaatillit marloriarlutik kapitinnissamik neqeroorfigineqartassapput.