Meeqqanut ileqqaarutit atorunnaarsinneqarput
Meeqqanut ileqqaarutit aningaasartaat Grønlandsbankimi kontonut nalinginnaasunut siullermik ikineqassapput, tassanngaanniillu meeqqat inuusuttuaqqallu 2010-mi ukiortaamiit aningaasat tigusinnaagaat Inatsisartut ullumi akuersissutigaat.
Meeqqanut ileqqaarutit 2007-imi Naalakkersuisuusimasunit atulersinneqarput ukiullu tamaasa 18 millioner koruunit missaannik akeqartarlutik.
Meeqqat tamarmik immikkut januaarip aallartinneri tamaasa 1.000 koruuninik ikisivigineqartarput. Aningaasat meeraq aatsaat 18-inik ukioqalerpat tiguneqarsinnaasut aaqqisoqaraluarpoq. Maannali tassa ikinnerpaamik meeqqat 17.000-it checkimik 1.000 koruunit 3.000 koruunillu akornanni aningaasartalimmik tigusisussanngorput.