Meeqqanut ilaqutariinnullu aningaasaliissutit nungulertorsinnaapput
- Suliniutigineqartut ataqatigiissaarneqarnissaat pisariaqarluinnarpoq, ataqatigiissaarisoqanngippammi aningaasaliissutit 25 millionit koruunit nungulertorumaarput, Kåre Halvorsen oqarpoq.
Meeqqat ilaqutariillu atugarisaasa pitsanngorsaavineqarnissaannut suliamik ilisimasallit kiisalu suleqatigiissitat amerlapput, ataqatigiissaarisoqanngippallu aningaasat immikkoortinneqartut 25 millionit koruunit nugulertorumaarput, Kåre Halvorsen oqarpoq. Meeqqat ilaqutariillu atugarissaarnissaannut innersuussutigineqartut taassumap tikilluaqquai, suliniutissallu aallartinneqarlerpata meeqqanik ilaqutariinnillu ulluinnarni qanimut sullissisut peqataatinneqarnissaat Kåre Halvorsenip pingaartuunerarpaa.
- Ajornartorsiutit arlaqartut samminiarneqarput ullorlu ataasiinnaq atorlugu ajornartorsiutit qaangerneqarsinnaanngillat. sulinermi immikkut ilisimasallit saniatigut meeqqanut ilaqutariinnullu ulluinnarni sullissisut, soorlu inunnik isumaginninnermi siunnersortit, perorsaasut, ilinniartitsisut suleqataanissaat pingaaruteqarpoq, Kåre Halvorsen oqarpoq. Sullissisut ilinniaqqissinnaanerisa pitsanngorsaavigineqarnissaat pisariaqarsoraa.
-Soorlu meeqqanut inuusuttuaqqanullu ilisimasatigut qaffassarsinnaanerannut periarfissat pitsanngorsaavigineqarnerisigut. Sulisunimmi ilinniarsimasunik amigaateqarpugut, ilinniarsimasullu pigineqartut suliassaminnut pikkorissarneqarsinnaasariaqarput, Kåre Halvorsen oqarpoq.
