Meeqqanut atuakkiat nutaat marluk

Nunatsinni meeqqeriviit tamarmik qaammat naalerpat imaluunniit novembarip aallartilaarnerani meeqqanut atuakkiat ’Fanta allallu’ aamma ’Qupaloraarsuk allallu’ pissavaat.  Ullukkut paaqqinnittarfimmiit aamma kalaallisut atuakkat taakku marluk piumaarpaat, angajoqqaat soqutiginnittut atuakkat kingusinnerusukkut aamma pisiarisinnaassavaat.

-Nunatsinni meeqqat soqutigisaat aallaavigalugit atuakkat ukua sanaajupput, taama atuakkiortoq aamma Inerisaavimmi  Meeqqerivitsialaap immikkoortortaqarfiani pisortaagallartoq Naussunguaq Lyberth oqarpoq.

Atuakkat sananeqarnerini periutsit ilikkalertorfiusut tunngaviit arfineq marluusut aallaavigalugit sanaajupput. Nunatsinni meeqqerisut sulinerminni periutsit ilikkalertorfiusut arfineq marluusut aallaavigalugit meeqqerisassasut Meeqqerivitsialaap siunniunnikuuaa, tassa pinnguarnikkut, oqaloqatigiinnikkut, meeqqat apeqquteqartarnerisigut ineriartornissaat ilikkagaqarnissaallu qitiutinneqarluni.

Atuakkat ’Fanta allallu’ aamma ’Qupaloraarsuk allallu’ siunertarivaat meeqqanut sammineqarsinnaasunik inersimasunut isumassarsisitsinissaq. Atuakkat oqaluttuanik nuannersunik imaqarpoq meeqqallu pinnguaatigalutit ilinniarsinnaanerannik ammaassisuullutik.  

-Meeqqap nalunngisaanik apersoqqaariarlugu , taava oqaluttuamik atuffasseriarlutik, taava  meeraq sammisaqartillugu. Atuagaq tunngavigalugu meeraq sammisaqartikkukku tunngaviit arfineq marluk tunngavigalugu meeraq sammisaqartissavat, Naussunguaq Lyberth oqarpoq.

Nunatsinni  ulluinnarni pisartunik meeqqanut ilisarnarluartunik titartakkanik atuagaq assiliartalersorneqarnikuuuvoq. Atuagaq ataaseq immikkoortunut qulinut agguataarneqarnikuuvoq, immikkoortut tamarmik immikkut sammisassanik nuannerunartunik siunnersuuteqarlutik. Atuakkani marlunni taakkunani inersimasut meeqqanut paarisaminnut qanoq sunillu apeqquteqarsinnaaneranik aamma siunnersuuteqarpoq. Meeqqat apeqquteqarnikkut eqqarsalersinnissaat anguniarneqarluni.  

- Paasineqarnikuuvoq meeqqat ullut tamaasa atuffanneqaraangamik ineriartornerat sukkanerusartoq, taava aamma meeqqap nammineq oqaatsiminik ineriartornerani tapersersuutaalluni, taama Naussunguaq Lyberth oqarpoq.

Atuakkat Kalaallit Nunaanni pisartut meeqqallu inuunerannut tunngassuteqartut aallaavigalugit suliaavoq. Soorlu Qaanaami, kujataani aamma Tunumi meeqqat aamma ilisarisinnaasaat atuakkani aamma sammineqarput.

Atuakkat katillugit sisamat saqqummersinneqarumaarput, meeqqanut suli oqaaseqanngitsunut atuagaq ataaseq saqqummersinneqarumaarpoq, atuakkallu sinneri pingasuusut meeqqanut pingasuniit arfinilinnik ukiulinnut naleqqussarnikut saqqummersinneqassallutik.

Atuakkat ’Fanta allallu’ aamma ’Qupaloraarsuk allallu’ Inerisaavik aamma Milik Publishing suleqatigiinnerisigut saqqummersinneqarpoq.

Periutsit ilikkalertorfiusut tunngaviit arfineq marluusut pillugit paasisaqarnerorusukkuit ataaniittoq tooruk.

http://www.inerisaavik.gl/fileadmin/Meeqqerivitsialak/PDF-filer/Nittartagaq.pdf