Meeqqanut atuakkat marluk juullimut pisiassanngorlugit saqqummersinneqarput

Atuagaq "Erinarsuutikka" sivisuumik pissarsiassaasimanngilaq, maannali naqiteqqinneqarluni saqqummerpoq. Allannguuteqartinnagu saqqummersinneqarpoq, ataasiakkaanilli iluarsiisoqarlunilu ilassuteqartoqarsimalluni. Erinarsuutit atuakkamiittut naqinnerit tulleriinneri malillugit immikkoortitigaallutik tulleriiaarneqarsimapput. Immikkoortut tallimaasut tassaapput erinarsuutit nalinginnaasut erinarsuutillu pinnguaatitallit, sinnassaatit, sisorarfimmi erinarsuutit juullisiutillu.

Atuagaq ”Nasaq teqqialik piginnaanilik” meeqqanut arfineq-marlunnit aqqaneq-marlunnut ukiulinnut saaffiginnittuuvoq. Atuffassissutigineqarsinnaallunilu taamatut ukiulinnit nammineq atuarneqarsinnaalluni. Atuakkami pingaarnertut inuttaasut tassaapput nukappiaraq kalaaleq Manu nukappiararlu kinamiu Miu. Soorunami aamma nasaq teqqialik piginnaanilik, Manup aanaavata sissami nassaava. Atuakkap imarisaa eqqartussanngilarput, ilaqutariinnilu meerartalinni juullip orpiliaata ataani nassaassaanissaa qularnanngilaq.