Meeqqanut atuagaq nutaaq saqqummissaaq

Silaannaap allanngoriartornerata kingunerisai pillugit meeqqanut, amerikamiup arnap Carole Douglisip atuakkiaa, oqaluttuamik nunatsinni pisimasuutitamik imaqartoq, Naalagaaffiit Peqatigiit, silaannaap allanngoriartornera pillugu Afrikami Nairobimi ataatsimeersuartitsinerani saqqummersinneqassasoq, Akilinermi Nunatsiami nutaarsiassaqartitsivik, Nunatsiaq News, tusarliussivoq.

Silaannaap allanngoriartornera aallaavigalugu, Carole Douglisip atuakkiami oqaluttuaraa nukappiaraq Tore, nunatsinni nunaqarfiit ilaanni najugaqartoq, taanna silaannaap kissakkiartornera pissutigalugu sikukkut saalisimaqisukkut qimussertitsilluni nakkarpoq.

Tore nakkareersoq Sassumap Arnaata sinnattortippaa nassuiaallugulu silaannap kissakkiartuinnarnera sikup saaliartuinnarneranut pissutaasoq.

Carole Douglisip silaannap allanngoriartornerata kingunerisai pillugit meeqqanut atuakkiaa tuluttut allagaasoq atserneqarsimavoq: “Tore and the town on thin ice”, apeqqummillu ima paasineqarsinnaasumik naggaserneqarpoq: Illit qanoq iliorsinnaavit?