Meeqqanut atuagaateqarfik ilisimatusarnermik sammisaqartitsivoq

Nuummi Nunatta Atuagaateqarfiani Meeqqanut Atuagaateqarfiup ukiaanerani sammisassaqartitsinini sapaatip akunnerani matumani aallartikkamiuk, pinngortitalerinermik ilisimatusarnermik sammisaqartitsiniarpoq, tassani sammineqassalluni "ujaqqat atorlugit sanaartorneq".
Allattoq Elisa Isaksen
septembarip 21-at 2009 08:36

Matumani meeqqat eqqarsaatersussapput sanaartornermi atorneqartartunut tunngasunik misileraassallutik, filmerlutik, pinnguaatinik sammisaqarlutik saqqummersitsillutillu.

Ullaap tungaanilu nalunaaqutaq qulit qeqqaniit illoqarfimmi 5. klassit tamarmik qaaqquneqarput, tassani Aatsitassanut ikummatissanullu Pisortaqarfimmiit ujarassiuut marluk, ujaqqanik misileraanermik oqaluttuarlutillu takutitsissammata.

Ukiaanerani sammisassanut ilaapput nukappiaqqanut unnussiortitsineq aamma niviarsiaqqanut unnussiortitsineq, tassani pineqarlutik 13-iniit 21-nut ukiullit. Nukappiaqqat oktobarip aallaqqaataani unnussiuaassapput, niviarsiaqqallu novembarip tallimaani unnussiuaassallutik. Unnuit taakku unnukkut arfineq-marluniit qulit tungaanut ingerlanneqassapput.

Sapaatip akunnerani 42-mi - tassa oktobarip aqqaneq-aappaanniit 18-annut sammisaqartitsisoqassaaq, ullut tamaasa filmertitsisoqartassalluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq