Meeqqanut aningaasanik ileqqaartarneq naalakkersuisut atorunnaarsinniarpaat
Aningaasaqarnermut naalakkersuisoq Palle Christiansen oqarpoq meeqqanut aningaasanik ileqqaagaqartarneq atorunnaarsinniarneqarnera, meeqqanut inuusuttunullu massakkorpiaq pisariaqartitsisunut ikiuisinnaanissartik kissaatigimmassuk taama aalajangersimallutik. Aviaaja Kielsen paasissutissiisaaq.
- Kissaatigisarput tassaavoq aningaasat massakkorpiaq pisariaqartinneqartut meeqqanut inuusuttuaqqanullu pisariaqartitsisunut atorsinnaalernissaat. Aningaasanik ileqqaagaqartitsinermi aatsaat inuusuttut 18-ileereernerminni aningaasat atorsinnaalersarmassuk. Uagullu isumaqarpugut massakkorpiaq aningaasat atorfissaqartikkaat, Aningaasaqarnermut naalakkersuisoq Palle Christiansen oqarpoq.
Qineqqusaarnermi partiit arlaqartut meeqqat atukkamikkut pitsanngorsaaffigineqarnissaat oqariartuutigisaqattaarpaat. Naalakkersuisooqatigiilli isumaqatigiissutiminni kissaatigaat meeqqanut aningaasanik ileqqaagaqartarneq atorunnaarsinneqassasoq. Tamanna imminut akerlilertutut oqaatigisariaqarunaraluartoq, Palle Christiansenip nassuiaatissaqarluartippaa.
- Meeqqanut aningaasanik ileqqaagaqartitsineq meeqqat atugarisamikkut pitsanngortinnavianngilaa. Maannakkut aningaasartuutaavoq immaqalu kingusinnesukkut atorneqarsinnaasoq. Inuusuttulli 18-ileereernerminni aningaasat tigunialerpassuk piumasaqaatit amerlasuut qulakkeerneqareersimasussaapput. Uagut kissaatigisarput tassaavoq atugassaritinneqartut massakkorpiaq iliuseqarfiginissaat. Taamaaliornikkut meeqqat inuusuttullu sipaarfigineqarnavianngillat, illuatigulli iluaqutaasussaapput massakkorpiaq, aningaasaqarnermut naalakkersuisoq oqarpoq.
Meeqqanut ileqqaagaqartitsisarneq 2007-imi aallartimmat 17,7 millioner koruuninik annertussuseqarput. Ukioq manna 18,3 millioner koruunit meeqqanut inuusuttuaqqanullu 16.600 missaanik amerlassuseqartunut aningaasanut inatsit aqqutigalugu immikkoortinneqarsimapput. Meeraq ataaseq ukiumut 1.000 koruuninik kontomut ileqqaagassarsisinneqartarpoq. Ileqqaagaqartitsinermi tre procentimik erniaqartinneqarpoq, taamaasilluni aningaasanik ileqqaagaqartitsisarneq ingerlaanarsimagaluarpat ukiullu 18-it ileqqaagaqarneq ingerlanneqarpat taava meeraq ataaseq 24.000 koruuninik pissamaateqassagaluarpoq.
- Meeqqat inuusuttuaqqallu ukiut kingulliit pingasut aningaasanik ileqqaagassanik pissarsereersimasut ukiut qulit qaangiuppata 18-iliigunik aningaasassaqartinneqarput. Eqqaamasariaqartorlu tassaavoq aningaasat amerlanerpaamik 20.000 koruunit tiguneqartussat ilinnialernermi initaarnermiluunniit aningaasat taakku suunngitsuaraasussaammata. Isumaqarpugullu aningaasanik ileqqaagaqartitsisalerneq qineqqusaarutaanaassimasoq uagulli isumaqarpugut aningaasat massakkut atortariaqartut, Palle Christiansen naggasiivoq.
Meeqqanut aningaasanik ileqqaagaqartitsisarneq ukiamut novemberimi akuerineqassappat, aningaasanut inatsimmi 2010-mi saqqummersussamit peerneqareersimanissaa naatsorsuutigineqarpoq.
