Meeqqanut akilersuutit ullutsinni akinut malinnaajunnaartut

Assi © : KNR
marsip 27-at 2007 10:40

Meeqqamut akilersuutit, meeqqamut ataatsimut ukiumut ullumikkut 9096 koruuniusarput, tassa ukiup affaanut 4548 koruuniusarlutik, naatsorsoqqikkaanni ullormut 25 koruunti missarpiaaniittarlutik. Pisiassat allat akitsoriartortillugit meeqqanut akilersuutisiat ullutsinni akinut naleqqukkunnaavissut, anaanaq ataatsimik meeralik, meeqqanullu akilersuutinik pisartoq, Hanne Petersen naliliivoq:

-Naammagittarnartarpoq. Naammagittarlunga tigusarpakka, ukiup affakkaarlugit tigusarpagut, naatsorsussagaannilu qaammammut 700 koruunit missaanniittarput. Ullumikkullu inuuniarneq akisoorujussuulluni, ineqarneq, atisaqarneq, nerisassat bussit assigisaallu eqqarsaatigissagaanni.

Aperaarput qaammammut 700 koruunit missaat sumut naammattarnersut, akivoq:

-Tigugaangakkit siullermik meeqqap atisassai soorunami isumageqqaartarpakka, tassani ingerlaannaq nungungajattarput, ilaatigut ullormut nunguttarput. Ilaatigulli atisaannanarnut atorneq ajorpakka, aamma soorlu akiligassanut tapertarisarakkit.

Hanne Petersen isumaqarpoq meeqqamut akilersuutit qaammammut ikinnerpaamik 1.500 koruuninut qaffanneqartariaqartut, ullutsinni akinut naleqquttunngussagunik.

- Annikitsuaraanngitsunik malunnaatilinnilli qaffakkunikkik iluarnerussagaluarpoq.

Meeqqanut akilersuutit kingullermik qaffanneqarput, ukioq 1994-imi.

Meeqqanut akilersuutit qaffanneqarnissaannik, kingusinnerpaamik Inatsisartut ukiaru ataatsimiinneranni naalakkersuisut saqqummiusseqqullugit peqquneqarnissaannik, Inatsisartuni ilaasortap attaviitsup Esmar Bergstrømip siunnersuutaa, Inatsisartuni ullumi siullermeerlugu oqaluuserineqassaaq.