Meeqqanut akilersuutit qaffakkusuppaat
Inatsisartut ippassaq ataatsimiinnerini Inuit ataqatigiit Demokraatillu siunnersuutigaat meeqqanut akilersuutigineqartartut qaffanneqarnissaat.
Uersaanninnermi ataataasup anaanaasulluunniit meeqqaminik tigumminninngitsup meeqqamut ataatsimut ukiup affaanut 4.548 koruuni akiuliutigisarpaa. Tamannalu maanna 5.394 koruuninngorlugu qaffanneqarnissaa siunnersuutigineqarpoq.
Meeqqamut ataatsimut ukiup affaanut akiliuteqartarnermi aki 1994-imiilli akigitinneqarpoq.
Tunngavilersuutigineqarporlu, meeqqap mikineraniit inuusuttuaranngorneranut aningaasartuutaasartut annertoqimmata angajoqqaajusumullu meeqqaminut pilersuiniaraluartumut ajornartorsiornermik pilersitsisarlutik.
Oqaluuserisaq siullermeerlugu ippassaq inatsisartut oqaluuseraat. Isumaqatigiissutaavorlu inatsisartuni oqaluuserineqaqqinnginnerani Ilaqutariinnermi ataatsimiisitaliami suliarineqaqqaassasoq.
Taama aalajangernermut pissutaavoq, uersaannittut ilai kommuninut akiliinngitsoortarmata tamannalu kommuninut akisoorujussuanngortarmat.
