Meeqqanut akilersuutinik qaffaaqqusineq itigartinneqarpoq
Meeqqanut akilersuutit qaffanneqarnissaannik, kiisalu meeqqanut akilersuutit qaffanneqarnissaannut siunnersuummik, Naalakkersuisut kingusinnerpaamik Inatsisartut ukiaru ataatsimiilerpata saqqummiusseqqullugit peqquneqarnissaannik, Inatsisartuni attaviitsoq Esmer Bergstrøm siunnersuuteqarpoq, siunnersuutaali Inatsisartuni amerlanerussuteqartunit ullumi taperserneqanngitsoorpoq.
Meeqqanut akilersuutit qaffanneqarnissaannik Esmer Bergstrømip siornagut aamma siunnersuuteqarsimasup siunnersuutini upernaaq manna qaqeqqippaa.
Esmer Bergstrømip siunnersuuteqarnermini meeqqanut akilersuutit ukiuni aqqaneq marlunni kingullerni qaffanneqarsimannginnerat tunngavilersuutigaa, tikkuarlugulu, naak amerlasuut inuiaqatigiinnut aningaasanik akiitsoqaraluaqisut, qaffaannginnissamut akiitsut utoqqatsissutaasariaqanngitsut, akiitsunillu akiliisannginneq meeqqat angajoqqaalluunniit kisermaat akisussaaffiginngikkaat erseqqissaatigalugu.
Esmer Bergstrømip siunnersuutaa Naalakkersuisut siunissami eqqarsaatersuutigisassaasa salliutinniagassaasalu ilangigaat, Naalakkersuisut akissuteqarnerminni erseqqissaateqarput.
Akilersuutit annertussusissaasa aalajangerneqarnissaat siunertaralugu ilaatigut qulaajaanermik kinguneqartussamik meeqqanullu akilersuutit aappaagu 2008-mi qaffaavigineqarsinnaanerannik siunertaqartumik Naalakkersuisut suliamik aallartitsiniartut, Ilaqutariinnermut Naalakkersuisoq Aleqa Hammond akissuteqarpoq.
Esmer Bergstrømip siunnersuutaata aappassaaneerneqartigani ataatsimiititaliami suliarineqarnissaanik Inuit Ataqatigiit Demokraatillu innersuussuteqaraluarput, tamannali Inatsisartuni partiinit allanit Naalakkersuisunillu ilalerneqanngilaq.
