Nunatsinni meeqqanik sumiginnaasarneq piffissami kingullermi oqallisaangaatsiartoq naalakkersuisunut aappagu 2006-imut aningaasanut inatsississamik maanna suliaqaleruttortunut aamma annguppoq. Ilaqutariinnermut naalakkersuisoq Tommy Marø meeqqat sumiginnakkat pillugit sullissinerup siunissami pitsanngorsaaffigineqarnissaa pillugu iliuusissanik arlaqartunik maanna aallartitsiniarpoq. Pitsanngorsaanissamut alloriarnerit siulliit marluusut Tommy Marø oqarpoq:
-Iliuuserisassaq siulleq atssaavoq suleqatigiissitaliamik suligasuartussamik pilersitsinissaq. Naalakkersuisoqarfiit pingasut, Kanukoka Isumaginnermillu ilinniagaqarsimasut peqatigiiffiat PIP suleqatigiissitami suleqatigiissapput.
Suleqatigiissitassap Naalakkersuisut Inatsisartunut qaqitassaannik siunnersuuteqarfigisussaavai.
- Suleqatigiissitassaq sap.ak. arfinilinni sulinissaanut periarfissinneqarpoq, sulinerat aningaasanik naleqassappat, aningaasartassai Naalakkersuisut Aningaasaqarnermullu Ataatsimiititaliaq aqqutigalugit ujartorneqartariaqassammata.
Suleqatigiissitap saniatigut meeqqat inuusuttullu pillugit ilisimasaqarfiup MIPI-p sulisua ataatsimik ilaniarneqarpoq. Taamaalilluni MIPI-p sullissinera aamma nukittorsarneqassasoq Tommy Marø oqarpoq:
- Nunatsinni meeqqat inuusuttuaqqallu atugaat pillugit paasissutissanik katersinermi suliassarpassuaqarpoq, suliaqartorlu annertoorujussuarmik suliaqareermat ataatsimik suleqateqalernissaa pissusissamisoortutu nalilerlugu qinnuteqarpugut.
Tommy Marø-p neriuutiginerarpaa qinnuteqaatertik paasineqarluarluni akuersissutigineqarumaartoq. MIPI-p sulisoqarnikkut nukittorsarneqarnissaanut atatillugu aningaasat 640.00 koruunit missaat qinnutigineqarput, qinnutigineqartunit sinerissamut angalasarnissat aamma matussuserneqassallutik. MIPI-mi sulisut marlunngussappata atorfinittussap ukiortaamiit atorfininnissaa naatsorsuutigineqartoq Tommy Marø oqarpoq.