Meeqqanik pinerliisimannginnermut uppernarsaat ukiortaamiit atuutilersinnaassaaq

Sulisitsisut meeqqanik 15-iliineqarsimanngitsunik sullissisussamik atorfinitsitsigaangamik uppernarsaammik taava piumasaqaateqarsinnaalissapput.

Meeqqanik pinerliisimannginnermut uppernarsaat meeqqanik atornerluisarnerit ikilisarneqarnissaat pillugu sanaajusoq qangalili piviusunngortinniarneqalerpoq, siunnersuulli Inatsisartuni akuersaarneqarnissaa ilimagineqarpoq.

Pinerliisimannginnermut uppernarsaat Det Centrale Kriminalregisterimit piniarneqartarpoq, meeqqanik Danmarkimi Nunatsinniluunniit atornerluisimasut taamaalillutik takuneqarsinnaanngortarput.

Sulisitsisut pinerluttuliorsimannginnermut uppernarsaammik maanna piumasaqarsinnaalereerput, sulili atorluarneqarpallaarani. Meeqqamik atornerluisimannginnermut uppernarsaammik taamaammat piumasaqaateqartalernissaq siunniunneqarpoq.

Sulisitsisoq taamaattumik atuinngippat akiliisitaasalersinnaassaaq.

Sulisitsisup uppernarsaammik politiinit piniarnisaanut suliffissarsiortup akuersaassavaa, suliffissarsiortorlu akuersinngippat atorfinitsinneqarsinnaanngilaq.

Inatsisissatut siunnersuut piviusunngussappat taamanikkussamut atorfinittussanut kisiat atuuttussaalissaaq, ullumikkut atorfinereersunut atuunnani.

Siunnersuut assigiinngitsorpassuanut atuutsinneqarsinnaassaaq, suliffeqarfinnut ataasiakkaanuinnaq atuunnani, timersoqatigiiffinni peqatigiiffinnilu nammineq kajumissutsiminnik suliaqartunut aamma atuutsinneqalissalluni.