Meeqqanik pinerliisimannginnermut uppernarsaat inatsisartuni piareerpoq

Inatsimmut siunnersuut ukiuni tallimani kingullerni ingerlanneqareerpoq. Paamiunilu nakorsaq taartaasimasoq meeqqamik atornerluisimasutut Damnarkimi pineqaatissineqarsimasoq ilisimaneqarsimassagaluarpoq inatsit siornatigulli atuutilereersimagaluarpat.

- Inatsisissatut siunnersuut tuaviuunniarsiuk, atuutilersinniassavarput. Inatsisartuni partiit tallimaasut oqaaseqartartui tamarmiullutik tamanna inassutigaat.

Sulilersussat meeqqanut pinerluuteqarsimannginnerannik uppernarsaammik sulisitsisut pinngitsooratik piumasaqartarnissaat pillugu inatsisissatut siunnersuut naalakkersuisut Inatsisartut upernaaru ataatsimiilerpata saqqummiussassaat taamaalilluni inatsisartunit 31-init tamanit tapersersorneqarpoq, KNR-imit partiit oqaaseqartartuinut sianeqattaarnitta tamanna takutippaa.

Meeqqanut pinerluuteqarsimannginnermut uppernarsaat tassaavoq pinerlussimasunut allattorsimaffimmiit takussutissiaq, Kalaallit Nunaanni Danmarkimilu meeqqamik atoqateqarsimaneq pissutigalugu eqqartuussinernit tunngaveqartoq.

Upernarsaammik taama ittumik nunatsinni atuisoqaraluarpat, nakorsaq, Danmarkimi niviarsiaqqamik ukiukitsumik kinguaassiuutitigut atornerluisimasutut 2008-mi eqqartuussaasimasoq, Paamiut peqqinnissaqarfianni taartaasimassanngikkaluarpoq.

- Aamma amiilaarutigeqaarput akuersaarsinnaanagulu pissutsit ima ittuussappata soorlu tusaripput nakorsamik paarlattaasoqarsimasoq, Siumup siulittaasua Aleqa Hammond taama oqarpoq.

Inatsisartuni amerlanerussuteqartut Naalakkersuisut inatsisissamik siunnersuusioqqullugit ukiuni tallimani kingullerni marloriarlutik pisinnaatippaat.

Naalakkersuisut suliassatik naammassisimagaluarpatigit, Paamiuni nakorsaq taartaasoq, meeqqamik atoqateqarsimasutut eqqartuunneqarsimasoq, taartaasimassanngikkaluarpoq.

Piffissami inatsimmik suliaqarfissaagaluami Siumut Naalakkersuisuni siuttuuvoq, Aleqa Hammond ima oqarpoq:

-Naalakkersuisuusimasuni Siumut siuttuusimagaluartoq naalakkersuisooqatigiittuaannarpugut partiit allat peqatigalugit tamattaalluta akisussaaqatigiippugut, akisussaaqatigiinnermi pingaaruteqartorujussuuvoq.

Suliassat tamarmik inatsisartunit akuersissutigineqartut pillugit naalakkersuisut pisussaapput suliassiissutigineqartut piviusunngortinnissaannut, inatsisinik taamatut ittunik inuiaqatigiinni qangarsuarli peqareersimasussaagaluarpugut, Aleqa Hammond naggasiivoq.

Nakorsaq Paamiuni suliunnaareerpoq. Eqqaasitsissutigeqqissavarput nakorsianik eqqunngitsumik pineqarsimasunik tusagaqarsimannginnatta.