Meeqqanik persuttaasarneq akiorniarlugu MIPI suliniuteqalerpoq
MIPI-p siulersuisuisa siulittaasuat Naaja Nathanielsen ima oqarpoq:
- Angerlarsimaffinni persuttaasoqartarnera Kalaallit Nunaanni ajornartorsiutaangaatsiartoq ilisimavarput, suliniutilli suut ingerlanneqarnersut, sumullu killinnersut paasissutissaatigineqanngillat. Taamaammat meeqqat inuusuttullu atugaat qitiutillugit suliniartoqartariaqalersoq, Naaja Nathanielsenip, tarnip pissusiinik ilisimasallip oqaatigaa, nangipporlu:
- Meeqqat angerlarsimaffimminni persuttaasarnernik misigisaqartartut toqqissisimananngitsumik peroriartortarput, tamanna nalunngilarput. Eqqarsartaasiannut ajoqutaasarpoq, toqqissisimaneq ajorput, inersimasunullu tatiginninnginnerulersarlutik, Naaja Nathanielsen oqarpoq.
Taassuma erseqqissaatigaa meeqqat inuusuttullu angerlarsimaffimmi persuttaasarnermik misigisaqartartut inuunerminni tamanna ingerlateqqittaraat, tamannalu nunat tamat akornanni misissuinertigut ilisimaneqareersoq.
Ajornartorsiut taamaalilluni annikinnerulerneq ajorpoq, akerlianilli alliartuinnartarluni. Taamaammat tamanna misissuinermi ersersinniarneqassaaq, siunissami suliniutigiumaagassat oqinnerulersinnaanissaat anguniarneqarluni.
Angerlarsimaffinni persuttaasarnerup akiorniarneqarnissaanut suliniut ukiup aappaa avillugu ingerlanneqarsinnaassasoq, Naaja Nathanielsenip ilimagaa.