Meeqqanik paarinerluisarneq iliuuseqarfiginiarlugu Ilaqutariissutsimut pisortaqarfik ukiarmi suleqatigiissitaliorpoq.
Meeqqat paarinerlutat iliuuseqarfiginiarlugit septemberimi suleqatigiissitalianik pilersitsisoqarpoq, inuit taakku Ilaqutariissutsimut pisortaqarfimmi, Kanukokami, IMAK-imi, Perorsaasut peqatigiiffianni kiisalu Peqqissutsimut pisortaqarfimmi aammalu Ilinniagaqarnermut Pisortaqarfimmi sulisuupput.
Taakku sapaatip-akunnerata tulliani ataatsimeeqqissapput, iliuusissanik nutaanik ujartuiniarlutik.
- Suleqatigiit massakkut naapeqqikkunik suut maannamut piunersut eqqartortussaavaat. Aammalu qinnuigisimavagut ataatsimiigiarnissamut takorluukkaminnik siunnersuuteqaqqullugit, soorlu; ukua pereersut saniatigut arlaannik sunik aallartitsisoqarsinnaanissaanik eqqartuinissamut, taama oqarpoq Ilaqutariissutsimut pisortaqarfimmi pisortaq Martha Lund Olsen.
Taama oqarpoq, Ilaqutariissutsimut Pisortaqarfimmi pisortaq Martha Lund Olsen.
Taassuma oqarnera naapertorlugu suliat oqimaallivallaartinnagit iliuuseqarnissaq pingaartuusoq.
- Ineriartortitsiuartussaavugut, soorunami siunertaanngilaq meeqqat ajornartorsiuteqalerpata pinngitsoornagit angerlarsimaffiup avataanut inississallugit. Kisianni taanna pitinnagu periutsit suut atorneqarsinnaanersut ujartorneqartariaqarput. Imaappoq suliap oqimaallivallaannginnerani arlaatigut ilaqutariinnut qanoq ikiorsiisoqarsinnaanersoq pingaaruteqarpoq, Martha Lund Olsen oqarpoq.