Meeqqanik kajungerisaqartut kommuninit ikiornissaqanngillat

Inatsisitigut tamanna tunngavissaqanngitsoq Kommuneqarfik Sermersuumi meeqqanut inuusuttuaqqanullu immikkoortortami pisortaagallartoq Karen D. Jensen oqarpoq.

- Massakkuugallartoq periarfissaqanngilagut. Ikiorserneqarnissaanut immikkut aningaasaliiffigineqarnikuunatillu inatsisiliunneqarnikuunngillat.

Kommune Qaasuitsoq Qeqqatalu Kommuneata radioaviisimiit paasiniaaviginerini paasinarsivoq, inuit meeqqanut kajungerisaqartut kommuneqarfinnut saaffiginnikkaangata ikiorserneqarnissaanut piareersimasuuteqanngitsut. Kommuneqarfiit pingasut inunnik meeqqanik kajungerisaqartunit saaffigineqartarsimannginnerarput, tamarmillu meeqqanik inuusuttuaqqanillu kinguaassiutitigut atornerlunneqartunut ikiorsiinissamut immikkoorsitsimallutik.

Meeqqanik kajungerisaqartunik Kommune Kujallermut saaffiginnittoqartillugu suliaq tarnip pissusaanik ilisimasalimmut oqaloqateqarnissaanut ingerlateqqinneqarput. Dorthea Kanuthsen ima tunngavilersuivoq:

Uani pingaartissimavarput taamatut imminut iliuuseqarfigerusuttut soorlu ajornartorsiutigisimagunikku taamatut kannguttaatsuliorusussuseqarlutik meeqqanut soqutiginnittuullutik, imminut iliuuseqarfigerusukkunik imaluunniit innersuuneqarlutik, suliassaasimappata, taava suliassatut allatulli tarnip pissusaanik ilisimasallip suliassaattut tigorusussimavarput, Dorthea Kanuthsen oqarpoq.

Meeqqanik inuusuttuaqqanillu kinguaassiutitigut atornerluisarneq annikillisarneqassappat, meeqqanik kajungerisaqartartut ikiorserneqartariaqartut kommunenit tamanit oqaatigineqarpoq.