Meeqqanik inuusuttunillu katsorsaariaasiat iluatsilluarpoq
Tasiilami meeqqat inuussuttuaqqallu 60-it missaannik amerlassuseqartut assilissat, pinngussat titartaanerlu atorlugit tarnip pissusaanik ilisimasalinnit Naja Lyberthimit Inuk Bourup Nielsenimillu katsorsarneqarput iluatsittunik kinguneqartunik.
Katsorsaariaasiat amerikami kinguaassiuutitigut atornerluisarneq pillugu ataatsimeersuarnissami qaammami uani pissussami saqqummiutissavaat.
Naja Lyberth Inuk Bourup Nielsenilu ukioq 2008-mi aallartillutik Tasiilami inuusuttuaqqat meeqqallu kinguaassiuutitigut kannguttaatsuliorfigineqarsimasut 60-it missaanniittut katsorsarlugit aallartippaat.
Katsorsaariaaseq oqaloqatiginninneq atorlugu aallartikkamikku, meeqqat inuusuttuaqqallu ammartinniarnerat ajornartorsiutaasimavoq. Taamaammat katsorsaaneq misigissutsit titartarnerisigut, assilissat pinnguaatillu atorlugit aallartinneqarpoq, tamannalu iluatsippoq. Katsorsarneqartut imminnut tatiginerulerput, tanngassimaarutiginerulerlutik killilersinnaanngorlutillu, Inuk Bourup Nielsen oqarpoq.
Katsorsariaaseq taanna kalaallinut tulluarnerusoq paasivaat. Taamaammat Amerikami kinguaassiuutitigut atornerlunneqarsimasut pillugit ataatsimeersuarnissamut atatillugu Naja Lyberthip Inuk Bourip Nielsenillu qaaqqussaanertik, suliamik akuerisaanerattut paasivaat. Paasivaat tamatumuunakkut takutinneqartoq kalaallit aamma sapinnngitsut. Ataatsimeersuarneq USA-mi Alabama-mi marsip ulluisa 23-annit 25-ata tungaanut ingerlanneqassaaq.
