Meeqqanik innarliisimannginnermut uppernarsaat ukiaru piariissaaq

Naak naalakkersuisut siulittaasua qinersinissamik suaarutiginnikkaluartoq, politikikkullu sulineq unitsikkallarneqaraluartoq, Naalakkersuisoqarfiup meeqqanik innarliisimannginnermut uppernarsaasiisoqartarnissaa pillugu inatsimmik allaffissornikkut suliaqarnera ingerlaannarpoq. Kultureqarnermut, Ilinniartitaanermut, Ilisimatusarnermut, Ilageeqarnermullu Naalakkersuisoqarfiup nittartagaani tamanna atuarneqarsinnaavoq.
apriilip 20-at 2009 07:39

Meeqqanik innarliisimannginnermut uppernarsaasiisoqarnissaanut inatsiliorneq ukiuni qulini ingerlasimasoq Radioaviisimi tusarliunnikuuarput, inatsisissamillu siunnersuut Inatsisartut ukiakkut ataatsimiinneranni saqqummiunneqalersaartoq, naalakkersuisoqarfik ilisimatitsivoq.Suliaq arlalinnik ilungersunartortaqarpoq. Ilaatigut danskit inatsisaannut tunngavoq aamma Nunatsinni pinerluttulerineq pillugu inatsimmut allanngortinneqaleruttortumut attuumassuteqarluni, kiisalu inaarutaasumik akuerineqarnissaata utaqqineqartariaqarpoq.

Inatsimmik unioqqutitsinerit Kalaallit Nunaata avataani pisimasut inatsimmi ilaatinneqassanersut nalornisigineqarnikuuvoq. Inatsisilerinermik ilisimasallit taamaattumik inatsiseqalernissaa 1999-imili innersuussutigisarpaat, sulili inatsiseqarani.

Kisianni tamanna maanna qaangerniarneqalerpoq. Meeqqanik innarliisimannginnermut uppernarsaateqartariaqarnissamut inatsit aappaagu januaarip ulluisa aallaqqaataanniit atuutilersussamik peqalerumaartoq, Kultureqarnermut naalakkersuisup Tommy Marøp neriorsuutigereerpaa.

Inatsisiliornissamik sulineq tassa ingerlaannassaaq, naak Inatsisartunut maanna qinersisoqaleraluartoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq