Meeqqanik immikkut pisariaqartitsisunik sullitaqartut pikkorissartinneqartarput
Pikkorissarnermi peqataasut sinerissaminngaanneersuupput, sapaatip akunneratalu siuliani modulikkaartumik pikkorissaaneq naammassisoq, Perorsaanermik Ilinniarfiup pikkorissaanermik Immikkoortortaqarfiani pisortaq Karo Thomsen Fleischer oqaluttuarpoq.
Pikkorissaanermi siunertaavoq Nunatsinni meeqqanik inuusuttunillu immikkut pisariaqartitsisunik sulisut pisinnaasamikkut piginnaasaannik annertusaanissaq; kiisalu Nunatsinni sulisut sumiiffinni assigiinngitsuneersut attaveqaqatigiiffigisinnaasaminnik pilersitsinissaat. Meeqqanik inuusuttunillu immikkut pisariaqartitsisunik sulisut suleqatiminnik sinerissamiittunik attaveqartarnermikkut ilikkakkaminnik ataavartitsinissaat ineriartortitsiuarnissaallu naatsorsuutigineqarpoq.
Sulisut pisinnaasaannik qaffassaaneq meeqqanut inuusuttunullu ajornartorsiortunut ungasinnerusoq isigalugu iluaqutaassasoq, Karo Thomsen Fleischer oqarpoq.
Perorsaanermik Ilinniarfimmiit pikkorissarsimasut katillugit 74-it manna tikillugu allagartartaarsimapput. Meeqqat inuusuttullu atuagarisaasa pitsanngorsarnissaannut suliniutissat suli annertuumik pisariaqartinneqarmata, pikkorissaaneq 2009-mi ingerlateqqinneqartussatut pilersaarutigineqartoq, Karo Thomsen Fleischer oqarpoq.
