Meeqqanik ikkatilliisartut pillagaasarnissaat anguniartariaqarpoq

Inersimasut meeqqanik ukiukitsunik kinguaassiuutitigut atornerluinissaq siunertaralugu internet aqqutigalugu attaveqarniartarnerat inerteqqutaasariaqarpoq. Sverigimi naalagaaffiup unnerluussisua taama isumaqarpoq.

Aviisi, Svenska Dagbladet, naapertorlugu, meeqqanik internet aqqutigalugu atoqateqarniartartut nunarsuaq tamakkerlugu sakkortuumik pillagaasarnissaannik Sverigimi naalagaaffiup unnerluussisuata inatsisiliortoqartariaqarsoraa.

Inersimasut meeqqanik atornerluinissamik eqqarsaateqartut sukkanerpaamik tigusarineqartarnissaat pisariaqarluinnartoq, naalagaaffiup unnerluussisua, Fredrik Wersäll, isumaqarpoq.

Misissuinerup nutaap takutippaa Sverigimi niviarsiaqqat 9. klassimi atuartut affangajaat inunnit nalusaminnit internetikkkut attaveqarfigineqartarput, taakkulu inersimasuusorineqarput, atoqateqarnissamik eqqarsaatillit.

Inatsisinik Sverigimi atortitsinermut ministeri,

Beatrice Ask, naalagaaffiup unnerluussisuanit siunnersuummik ullumi tigusaqassaaq, unnerluussisup kajumissaarutiginiarpaa meeqqanik ukiukitsunik internet aqqutigalugu attaveqarniartarnerup pillarneqarnermik kinguneqartalernissaa..

Internet aqqutigalugu ikkatilliiniartarneq ukiuni kingullerni annertoorujussuanngorsimavoq.

Ikkatilliisartut pillarneqartalernissaannik unnerluussisup Fredrik Wersällip siunnersuutaa riksdagimi partiinit tamanit tapersersorneqartoq, aviisimi Svenska Dagbladimi allaaserineqarpoq.