Meeqqanik ikkatilliisartumik unnerluussut politiinit soqutigineqarsimanngikkaluarpoq
Meerarpaalunnik kinguaassiutitigut atornerluisoqarsimaneranik Nuummi politiit erseqqissumik allakkatigut nalunaarfigineqaraluarlutik tunuartitsisimapput.
Unnerluutiginneqqaarnermiit tigusaasoqarnissaata tungaanut ullut 23-t ingerlasimapput, allakkanillu unnerluussissutinik allanik pingasunik nassitsisoqarsimagaluarluni.
Nuummi nunatta atuagaateqarfiani pisortaq Elisa Jerimiassen meeqqanik kinguaassiutitigut atornerluisoqartarneranik pasitsaassani ukioq manna marsimi allakkatigut nalunaarutigeqqaarpaa. Taassuma taama unnerluutiginninnermigut aternik taasilluni meeqqat arfinilinniit aqqaneq-marlunnik ukiullit pineqartut nalunaarummini erseqqissaatigaa. Unnerluussulli taama pinartigigaluartoq, Nuummi politiiniit tunuartinneqarsimavoq.
Elisa Jerimiassen allanik aamma unnerluussutinik allaqqippoq kingumullu allagai tunuartinneqarlutik. Pingajussaanik allakkatigut unnerluutiginneqqikkaluarpoq soqutigineqarpallaanngilarli.
Unnerluutiginnilluni saaffiginnissutai aatsaat soqutigineqalerput, Nuup kommuniata inunnik isumaginnittoqarfianut saaffiginnimmat.
Inunnik isumaginnittoqarfik borgmesterimut allareermat, borgmesteri politiinut allakkatigut saaffiginnikkasuarpoq, taamaalimmallu aatsaat qisuariartoqarpoq.
Tassalu marsip 24-iani iliuuseqartoqarnialerpoq, tassa unnerluutiginneqqaarnermiit ullut 23-t qaangiutereermata aatsaat iliuuseqartoqarluni. Angut tigusarineqarpoq eqqarsartaatsimigullu ajoquteqarsoralugu maanna misissugarineqarluni.
Borgmester Agnethe Davidsen isumaqarpoq, unnerluussinerup politiiniit tunuartinneqartarsimanera akuerineqarsinnaanngilluinnartoq. Taassuma politeeqarfimmi pisortaasut ataatsimeeqatigeerpai.
- Politiit pisortai ataatsimeeqatigigakkit isumaqatigiippugut kinaluunniit inersimasoq meeqqanut ikkatilliisoqarsimaneranik pasitsaassaqarluni saaffiginnippat pimoorullugu misissorneqartassasut, Agnethe Davidsen oqarpoq. Politimesteri Steen Thomsen radioavisimi apersorneqarusunngitsoq oqarpoq, kukkuneq tamanna ajuusaarnartuusoq, unnerluussutigineqartullu taamak qisuariarfigineqartussaanngimmata taamatut pisoqaqqinnginnissaa neriuutigalugu.
