Meeqqanik hornorujunik aallarusseriaraluartutut eqqartuussassanngortinneqarput
Franskit spaniamiullu 16-it Afrikami naalagaaffimmit, Tchad-imiit meeqqanik 100-nik aallarussiniarsimasutut unnerluunneqarput. Abeche-mi eqqartuussivimmi franskit qulingiluat, ikiuiniaqatigiiffimmi, Zoe´s Ark-imi sulisut, aallarussiniarsimasutut peqquserlussimasutullu eqqartuussassanngortinneqarput.
oktobarip 30-at 2007 12:32
Spaniamiut arfineq marluk, timmisartumi sulisut, meeqqanik 103-nik aallarussiniaqataasimasutut aamma eqqartuussassanngortinneqarput. Deby puffassimaaqisoq oqaluttuarpoq, meeqqat Europami meeqqanik atornerluisartunut tuniniarneqassamaarsimagaluartut.
Eqqartuussassanngortitat ilaat ikiuiniaqatigiiffimmi Zoe´s Ark-imi sulisut oqarsimapput, meeqqat angajoqqaaverussimasut Sudanip kippasinnerusortaani pikitsitsiffiusumiit, Tchad-imut killeqarfiup eqqaani, Darfurimeersut iluarnerusumik inuuneqalerniassammata aallarunniaraluarsimallugit.
Meeqqalli ilaat oqaluttuarput angajoqqaatik suli ajunngitsut, Tchad-imiillu Sudanimut killeqarfiup eqqaaniit nunaqarfinniit mamakujunnik kissinillu tuniorarneqarlutik aallarunneqarsimallutik.
