Meeqqanik atornerluisoq pineqaatissinneqarpoq

Narsap eqqartuussiviani angut 52-nik ukiulik Herstedvedsterimut killiligaanngitsumik inissinneqarnissaanik pineqaatissinneqarpoq. Angut nukappiaqqanik 17-nik ukiut arlallit ingerlaneri atornerluisimasutut pisuutinneqarpoq.

Angut pineqaatissinneqartoq 121.000 kroninik aamma akiligassinneqarpoq.

Illersuisup pineqaatissiineq Nunap eqqartuussisuuneqarfianut ingerlateqqikkaa, unnerluutigineqartup illersuisua, Leif Ellebæk Motzfeldt oqarpoq.

-Pineqaatissinneqartup piumasaa malillugu pineqaatissiissut nunatta eqqartuussivianut suliareqqitassanngortinniarlugu aalajangerparput, illersuisoq Leif Ellebæk Motzfeldt oqarpoq.

Eqqartuussineq matoqqasumik ingerlanneqarmat, Leif Ellebæk Motzfeldt-ip pisoq oqaaseqarfigeqqikkusunngilaa.

Narsap eqqartuussiviata aalajangerpaa, pineqaatissinneqartoq Narsap isertitsivianiiginnassasoq pineqartoq nunap eqqartuussisuuneranut pinissaata tungaanut.

Nukappiaqqanut atornerlunneqarsimasunut eqqartuussineq artornarsimaoq, tarnip pissusaanik ilisimatuup Ernst Peilmannip kommuniminngaanniit nukappiaqqat ilaqutaasalu ikiorneqarnissaannik ikiuisuusoq oqarpoq:

- Eqqartuussinerup ullut pingasut sinnerlugit ingerlanneqarnerani malinnaaninni, malunnarpoq nukappiaqqat eqqugaasimasut angajoqqaavisalu akornanni naalliunneq misigineqarpoq, qiasaqaat kamattaqalutillu, Tarnit pissusiinik ilisimasalik Ernst Peilmann oqarpoq nangillunilu;- Eqqartuussineq naammassineqarpat, ulluinnarlu aallarteqqilluni, meeqqat angajoqqaallu akornanni suliassat amerlaqaat. Aqagu meeqqat eqqugaasimasut angajoqqaavi inunnik isumaginnittoqarfimmi qanoq pisoqarnissaanik ataatsimeeqatigissuagut, nassuiarlugillu taamatut pineqaatissiisarneq qanoq kinguneqartarnersoq. Aamma eqqugaasut piumasut oqaloqatiginnittarnissamik pisariaqartitsisut neqeroorfigineqassapput tarnip pissusiinik ilisimasalinnik oqaloqateqartarnissamik, Ernst Peilmann naggasiivoq.

Angut 52-nik ukioqartoq nukappiaqqanik atornerluisimasutut unnerluutigineqarpoq, 17-llu pineqaatissutigalugit.