Meeqqanik atornerluisimasoq iperagaagallassanngilaq

Nunatta oqaluttuarisaanerani meeqqanik kinguaassiuutitigut atornerluinermik suliat annerit ilaat, angutip 59-inik ukiullip ukiut arfinillit matuma siorna pineqaatissinneqarneranik kinguneqarpoq.

Angutip misiligummik iperagaagallarnissamik qinnuteqaataa Nunatta Eqqartuussiviani ullumi suliarineqarpoq, eqqartuussisullu aalajangernera naapertorlugu angut iperagaagallassangilaq.

Unnerluussisoq naapertorlugu angut 59-inik ukiulik katsorsarneqarumasimanngilaq atornerlueqqissinnaaneralu ilimanaatigineqarluni.

Kinguaassiuutitigut atornerluisimanerit amerlasuut Aasianni Narsamilu pisimapput. Angut siullermik Aasianni eqqartuussaanermini nukappiaqqanik 27-nik kinguaassiuutitigut atornerluisimasutut pisuutinneqarpoq, kingusinnerusukkullu Narsami eqqartuussaanermini nukappiaqqanik qulinik atornerluisimasutut pisuutinneqarluni.

Angut piffissami killiligaanngitsumi pineqaatissinneqarsimasunut inissiisarfimmiittussanngorlugu pineqaatissinneqarsimavoq. Taamatut pineqaatissiineq sakkortuumik kinguaassiuutitigut pinerluttoqarsimatillu periarfissaasarpoq.

Unnerluussisoq malillugu angut iisartakkanik tissannaveersaatinik pisarusussimanngilaq. Illersortaatali oqarnera naapertorlugu angut pisarusussimagaluarpoq, kisianni taamatut oqarnerata eqqartuussisup upperinngilaa.

Tarnip nappaataanik ilisimatuup naliliinera unnerluusisussaatitaasup Kalaallit Nunaanni Eqqartuussivimmi ullumi atuarpaa, naliliinermilu oqaatigineqartut naapertorlugit  angutip takusinnaasimanngilaa iliuuserisimasani kukkusuusut.

Angut Sisimiuni pineqaatissinneqarsimasunut inissiisarfimmut nuunneqarsimavoq, ullumilu Sisimiut Eqqartuussivianiit video atorlugu attavigineqarpoq. Angutillu  iliuuserisimasaminik peqqissimissuteqarnerluni ersersinngilaa. Angut meeqqat eqqaaneeqqusaanngilaq.

59-inik ukiulik ukiut marluk qaangiuppata misiliummik iperagaanissaminik qinnuteqarluni misileeqqissinnaavoq.