Meeqqanik atornerluisartoq eqqartuunneqarpoq

Angut 42-inik ukiulik pineqaatissinneqarsimasunut killiligaanngitsumik inissiisarfimmiittussanngorlugu sapaatip akunnera kingulleq pineqaatissinneqarpoq, meeqqanik kinguaassiuutitigut atornerluisimasutut eqqartuunneqareerluni.

Angut 42-nik ukiulik arfineq pingasoriarluni unioqqutitsisimasutut eqqartuunneqarpoq, AG-mi ullumi saqqummersumi taama allaaserinnittoqarpoq.

Angut ukioq kingulleq ulloq 22. marts tigusarineqarpoq, Nunatta Atuagaateqarfiani Landsbibliotikariusup arlaleriarluni politiinut saaffiginnereernerata kingorna, meeqqat Nunatta Atuagaateqarfianiittut meeqqanik atornerluisartoq pulaagartik oqaluttuarigaat sulisup tusaasimavai.

Nunatta Atuagaateqarfiani sulisuusup nalunaarutiginnissutai politiit aallaqqaammut tunuarteqqaarsimavaat, kukkussutertilli kingusinnerusukkut nassuerutigisimavaat, tassami sukkanerusumik pilertornerusumillu qisuariaateqarsimasinnaagaluaramik.

Nuup Eqqartuussiviata eqqartuussutaa sakkortuninngoqqullugu unnerluussisussaatitaasut sapaatip akunnera kingulleq suliareqqitassanngortissimavaat, taamaalilluni 42-nik ukiulik killiligaanngitsumik matoqqasumi inissiisarfimmiittussanngortinneqarniassammat.

Eqqartuunneqartup illersuisuatalu suli eqqartuussut suliareqqitassanngortinniarnerluni isummerfigisi-manngilaat.

Katillugit meeqqat 25-it Nuummi politiinit suliamut atatillugu apersorneqarsimapput.