Meeqqanik atornerluisarsimanerit utoqqatsissutiginiarpai
Paavi Australiamut maanna tikeraalerpoq. Australiamilu oqartussat katuullit palasiisa meeqqanik kinguaassiuutitigut atornerluisarnerat misissuiffigalugu maanna aallarteruttorpaat.
- Ajornartorsiummi matumani ikiorsiissutaasumik aamma pisuussuteqartut inissinneqarnissaat ilagiillu katuullit saammaateqatigiinnissaat matumani pingaaruteqarluinnarpoq, paavi timmisartumi Australiamut ingerlaartilluni aviisiliortunut oqarpoq.
Paavip angalanermini taamatut utoqqatserniarnera kisiartaanavianngilaq. Tassami naatsorsuutigineqarpoq, siulini John Paul assigalugu Australiami katuullit ajoqersuiartortitaasa nunap inoqqaavinut iliuuserisarsimasaat eqqunngitsut pillugit utoqqatsissasoq.