Meeqqanik aallarussisarneq Folketingimi oqaluuserileraat
Meeqqanik aallarussisarneq pillugu inatsisissaq Folietingimi sisamanngorpat akuersissutigineqarpat taamaassaaq. Tassalu meeqqanik aallarussisarneq pillugu Danmarkimi nunatsinnilu inatsisit assigiissinniarlugit taamaassalluni.
Danmarkimilu angajoqqaajusup meeqqani angajoqqaatut oqartussaaqatini akuersiseqqaarnagu naalagaaffeqatigiit iluanni nooqatigisinnaammagu, aamma Nunatsinnii Danmarkimut nuunnermi taamaattoqarsinnaassaaq.
Meerarli naalagaaffeqatigiit akornanni nuutsinneqassappat, angajoqqaat arlariillutik akuerseqqaartassasut, Inuit Ataqatigiinnersoq Aaja Chemnitz Larsen isumaqarpoq.
- Meeraq nuussappat, meeralinnut tamanut angajoqqaatullu oqartussaassusermik avitseqateqartunut aamma tusarneqarnissaq pingaartorujusuusoraara, apeqqutaanani meeraq nunatsinnii Damarkimut illuanulluunniit nuussanersoq. Taamaammat ilaqutariinnut meerartalippassuarnut isumalipilussuusinnaasoq una eqqumaffigineruneqarpasinngimmat ernumanartoqartippara, Aaja Chemnitz Larsen KNR-imut taama oqarpoq.
Aamma atuaruk Angajoqqaat pillugit inatsisitaassaq IA-mit isornartorsiorneqartoq
MIO-p Danmarkimilu eqqartuussissuserisut kattuffiata aaqqissuussineq isornartorsiornikuuaat.
Kisianni nunat tamalaat Haagimi isumaqatigiissutaat naapertorlugu meeqqanik aallarussineq inatsisinik aatsaat unioqqutitsinerussaaq, nuna naalagaaffigisaq qimassimagaanni. Matumanilu nunarput Danmarkilu naalagaaffittut ataatsitut isigineqartut, isumaginninnermut nunamullu namminermut ministereqarfik naliliivoq.
Aamma angajoqqaat tamarmik angajoqqaatut oqartussaassuseqartillugit aappaata meeqqamik Nunatsinnit Danmarkimut nuutsinera pillugu pillarneqassappat, tamanna meeqqap pisariaqartitaanik pissuteqarsimassanngitsoq, ministereqarfik isumaqarpoq.
Siunnersuut sisamanngorpat aappassaaneerlugu suliarineqarpat Folketingimi amerlanerussuteqartut akuerissagaat naatsorsuutigineqarpoq.
Nunarput pillugu atatsimiititaliami amerlanerussuteqartut siunnersuut inatsisissanut ataatsimoortillugit Folketingimi suliarineqartunut ilaasoq tapersersorpaat, taakkununnga Siumut ilaalluni.
