Meeqqamik toqutsisimasutut pasineqartup tarnikkut pissusaa misissorneqarpoq
Meeqqamik angerlarsimaffiup avataani inissitamik paarsitilluni arnap toqutsisimasutut misissuiffigineqarnera suli ingerlanneqartoq, Nuummi politiit nalunaarutigaat.
Allattoq Louise M. Kleemann
apriilip 29-at 2008 14:03
Arnap meeqqamik toqutsisimasutut pasineqartup tarnikkut pissusaa ulluinnarnilu inuunera pillugit, Nuummi nakorsat misissuipput, misissuinerisalu inernerat Danmarkimi tarnimikkut innarluuteqartunik pinerluuteqarsimasunik naliliisartunit misissorneqarpoq. Misissuinerit naammassineqarnissaat Nuummi politiinit utaqqineqarpoq, taamaalillunimi aalajangerneqarsinnaalissammat, arnaq meeqqamik toqutsisimasutut pasineqartoq Nunatsinni pineqaatissinneqarsimasunut inissiisarfimmiittussanngorlugu eqqartuunneqassanersoq, imaluunniit Danmarkimi tarnimikkut innarluuteqartut paarnaarussiviannut inissinneqassanersoq.
Niviarsiaraq marlunnik ukioqangajalersoq, januaarip pingajuanni toquvoq, arnamit toqutsisimasutut pasineqartumit paaqqutarineqartilluni.
