Meeqqamik toqutsisimasutut eqqartuussaasut
Meerannguaq marlunnik ukiulik aqqunartitersimanini pissutigalugit 2010-mi marsip qaammataa toquvoq. Maanna Nunatta Eqqartuussivia eqqartuussereerpoq taasanilu meeqqat arnaa taassumalu inooqataa ukiuni qulingiluani pinerluuteqarsimasunut inissiisarfimmiittussanngorlugit.
- Taakku pisuutinneqarput arlaleriarlutik meeqqamut naalliutsitsisarsimasutut meeqqap toqunissaa qaammatinik arlalinnik sioqqullugu annersaasarnermikkut, politimesterip tullersortaa Morten Nielsen nalunaarpoq.
- Aamma 2010-mi marsimi meeraq ima annersartigisimavaat taanna ilisimajunnaarsimalluni - ikiortissamillu aallertoqanngimmat meeraq toquvoq, Morten Nielsen oqarpoq.
Eqqartuussinermi politiit piumasarisimavaat aappariit ukiuni qulingiluani pinerluuteqarsimasunut inissiisarfimmiittussanngortinneqassasut, tamannalu tassa Nunatta Eqqartuussiviata malippaa. Toqutsisoqartillugu ukiuni arfinilinni pinerluuteqarsimasunut inissiisarfimmiittussanngortitsisoqartarpoq. Maannali eqqartuussivik suli sukannernerusumik aalajangiivoq eqqorneqartut meeraammat marluinnarnik ukiulik.
- Unnerluussisut tungaanniit eqqartuussut nalilerparput meeqqamut annersaaneq pingaartumillu toqutsineq ajorluinnartutut isigineqartoq, Morten Nielsen oqarpoq.
