OL-Martin: Medaaliarpassuannannissatsinnik piumaffigineqanngilagut
Naalagaaffissuarnit sisorartartut OL-imut peqataatitat ikiorserneqartarnerattut Kalaallit Nunaat inukitsunnguusutut timersortartuminut taamaaliorsinnaanngilaq.
Tamanna ajoquteqarpoq, aammali arlalinnik pitsaaquteqarluni, Martin Møller oqarpoq.
- Pitsaaqutai tassaapput, naalagaafferujussuarneersutut medaaliarpassuarnik piumaffigineqannginnerput. Taava nammineq naammassisinnaasat ukkatarineqarsinnaanerusut, taanna oqarpoq.
- Taamaalilluni sungiusarnerni, arpannerni sisorarnernilu kiffaanngissuseqarnarneruvoq angusallu nammineq isumagisarpakka, Martin Møller nassuiaavoq.
AAMMA ATUARUK OL-mut peqataassagaanni pilliuteqartariaqarpoq
Paarlattuanik ikiortissaaleqinermik kinguneqartarpoq.
- Ajoqutaasinnaasut tassa nakkutigineqannginneq. Taava imminut sullinnerusariaqassaatit, aamma sisoraatit piareersarnerinut. Ikiorteqartarpungami, kisianni nunani allamiutulli amerlatiginngitsunik, Møller oqarpoq.
Martin Møllerilli OL-imut piareersarnera Nuummi pissutsit unammillernartoqartippaat.
AAMMA ATUARUK Talentarbejde skal skabe nye OL-atleter
Europami decembarimi sungiusareerluni angerlarmat, ukiup aallartinnerani Nuuk aputaasassimaqaaq.
- Iluamik sungiusarfissaqarani ajorpoq. Teknikki iluamik sungiusarneqarsinnaanngimmat unammillernarpoq, Martin Møller oqarpoq.
Teknikki pivallaarnagu, Martin Møllerip timini qaqqani arpalluni sungiusarnerusimavaa.
AAMMA ATUARUK OL-imi peqataaneq inuusuttunut timersortartunut maligassiuisoq
- Timikkut sungiusarluarsimallunga aallaruma ajunngilluinnarpoq, Møller oqarpoq.
Martin Møllerip neriuutigaa nuannarinerpaasamini, 50 kilometerimut ujakkaarnermi inuttut angusaqarluarnerpaassalluni. Kingullermik Sotjimi OL-ertoqarmat, taamatut ujakkaarnermi normu 45-nngorpoq.
AAMMA ATUARUK Laila Friis-Salling OL-imi peqataasussatut toqqagaasoq